Fýtboldan Qazaqstan ulttyq quramasy ótken aptada Eýro-2020 týrnırine qatysatyn Soltústik Makedonııa fýtbolshylarymen joldastyq match ótkizip, syrt alańda ótken kezdesýde iri eseppen jeńilip qaldy.
Talǵat Baısýfınov baptaıtyn Qazaqstan quramasyna bul kezdesýde tablodaǵy kórsetkishten buryn, qosalqy quramdaǵy jáne quramaǵa jańadan shaqyrylǵan fýtbolshylardy kúzdegi negizgi match aldynda synaqtan ótkizip alý mańyzdy boldy. Degenmen birinshi taımda negizgi quramda jańa oıynshylardan Erkin Tapalov shyqqanymen, ózge oıynshylardyń barlyǵy tegis ulttyq qurama namysyn qorǵap júrgen bolatyn. Birinshi taımnyń alǵashqy 30 mınýtyn táýir ótkizgen jerlesterimiz matchtyń 34-mınýtynda Abzal Beısebekov óz alańymyzda tártip buzyp, tóreshi 11-metrlik aıyp dobyn belgiledi. Penaltıdi sátti oryndaǵan Egzııan Alıoskı esepti ashty. Al birinshi taım aıaqtalar tusta Serikjan Mujyqov qarsylas oıynshysyna qarsy óreskel tártip buzǵany úshin bas tóreshi tarapynan «qyzyl qaǵazben» jazalanyp, alańnan qýyldy.
Ekinshi taım basynda bas bapker qaqpashy Stas Pokatılovtyń ornyna Muhammedjan Seısendi, Rýslan Valıýlınniń ornyna Ǵafurjan Súıimbaevty, Alekseı Shetkınniń ornyna Roman Murtazaevty alańǵa shyǵarsa, keıinnen Álibek Qasym, Baýyrjan Baıtana, Mıhaıl Gabyshev sekildi ulttyq quramaǵa jańadan kelgen oıynshylardy matchqa aralastyrdy. О́kinishke qaraı, keıbir jas oıynshylardyń ulttyq qurama deńgeıinde oınaýyna áli erte ekeni baıqalyp qaldy. Birinshi taımda áreń degende penaltıden gol soqqan alań ıeleri ekinshi taımda qaqpamyzǵa taǵy jaýapsyz úsh gol saldy. Buǵan S.Mujyqovtyń alańnan qýylýy da sebep bolǵany anyq. Qorytyndy esep – 4:0.