QR Mádenıet jáne sport mınıstrligi men Nur-Sultan qalasy ákimdiginiń kómegimen «Astana Opera» teatrynyń trýppasy ashyq aspan astynda 10-ǵa jýyq tegin konsert bermek, dep habarlaıdy Egemen.kz.
Elorda turǵyndary men qonaqtary qala alańdary – Mámbetov kóshesindegi Affarı BO aldy men Ortalyq qalalyq saıabaqtaǵy amfıteatr sahnasynda asqaq ónermen qaýysha alady. «Shyǵarmashylyq ujymymyz alǵash ret ashyq alańda óner kórsetkeli turǵan joq. Jyl saıyn Dj.Verdıdiń «Aıda» operasy syndy ǵalamat spektaklderdi ashyq aspan astynda oryndap júrmiz. Osyndaı jobalar aǵartýshylyq sıpatta jasalyp, qazaqstandyqtardy asqaq ónerge tartýǵa baǵdarlanǵan. Janǵa jaıly ári merekelik kóńil-kúı syılaımyz degen senimdemiz. Birqatar tosynsyı ázirledik, olardyń biri – Italııa, Shveısarııa, Japonııa, Reseı men Chehııadan kelgen sheteldik ártisterdiń óner kórsetýi», dedi «Astana Opera» teatrynyń dırektory Ǵalym Ahmedıarov.
Konsertterdiń baǵdarlamasy eresekterge de, balalar aýdıtorııasyna da qyzyqty bolatyndaı etip oılastyrylǵan. Sóıtip, jas kórermenderdi 13 jáne 19 maýsym kúnderi saǵat 12:00-de Affarı sahnasynda ótetin «Balalar syıǵa tartqan óner» atty konsert kútýde. Ár kúnderi balalarǵa jarqyn balettik jáne hor nómirleri usynylady. Balalar teatrlyq stýdııasynyń jetekshisi – Altynǵanym Ahmetova.
13 maýsym saǵat 20:00-de Affarı sahnasynda ótetin «Vokaldyq mýzyka jaýharlary» konserti jeksenbilik keshtiń romantıkalyq áserin arttyra túspek. Kópshilik nazaryna operalardyń belgili arııalary men dýetteri, tanymal halyq ánderi men romanstar, aspaptyq pesalar usynylady. Mýzykalyq jaýharlar «Astana Opera» teatrynyń opera solısteri men orkestr ártisteriniń oryndaýynda tyńdarmanǵa jol tartady.