Qazir elordada 32 aýla klýby bar, bul shamamen 3 myńnan astam balany qamtýǵa múmkindik beredi. Bul týraly Nur-Sultan qalasynyń ákimi Altaı Kólginov Instagram paraqshasynda jazdy, dep habarlaıdy Egemen.kz.
«Oqýshylar jazǵy demalysqa shyqty. Baǵa jetpes ýaqytty paıdaly ótkizý mańyzdy. Bilim alýmen qatar, demalý, súıikti ispen aınalysý, qurdastaryńyzben sóılesý jáne t.b. densaýlyqqa paıdaly.
Pandemııa densaýlyqty saqtaýdyń qanshalyqty mańyzdy ekenin kórsetti. Sport qoljetimdi bolýy úshin bıyl aýlalardy, saıabaqtardy, skverlerdi, býlvarlardy abattandyrý boıynsha aýqymdy jumystardy jalǵastyrýdamyz. Abattandyrý kezinde alańdardyń kópfýnksıonaldy bolýyna basa nazar aýdaramyz: ıaǵnı aýlada balalar fýtbol/basketbol oınap, trenajerlerde sportpen shuǵyldana alady. Sonymen birge aǵa býyn úshin demalys oryndarynyń bolýy shart. Bıyl qosymsha 150 aýla men 40 qoǵamdyq keńistikti (saıabaqtar, skverler, býlvarlar) abattandyramyz. О́tken jyly 76 gektardan astam aýmaq abattandyryldy», dep jazdy qala ákimi.
Sondaı-aq aýla klýbtarynyń jelisi keńeıetinin, qalanyń tórt eldi mekeninde iri dene shynyqtyrý-saýyqtyrý keshenderin salyp, sport, mádenıet nysandary jóndeletinin aıtty.
«Balalar ózderi unatatyn, qyzyǵyp oqıtyn sabaqtardy tańdaý kerek. Bul sýret salý, mýzykalyq aspaptarda oınaý nemese júzý, kúres, shahmat jáne t. b. Sonda ǵana keremet nátıjelerge qol jetkizip, sabaqtan lázzat alýǵa bolady!
Jazǵy demalysta fızıkalyq densaýlyqtan basqa, bilimdi de jetildirý kerek. Buǵan kitap oqý arqyly qol jetkizýge bolady. О́ıtkeni ádebıet týyndylary jarqyn ári qyzyqty saıahatty ashyp qana qoımaı, sózdik qordy tolyqtyrýǵa, saýattylyqty jaqsartýǵa múmkindik beredi», dedi elorda ákimi.
Memleket basshysy atap ótkendeı, oqýǵa degen qyzyǵýshylyq, kitap arqyly qorshaǵan álemdi taný mektep qabyrǵasynan qalyptasýy tıis, al oqýdyń joǵary mádenıetin qalyptastyrý, oqý saýattylyǵyn damytý bilim berý prosesiniń basym baǵyttarynyń biri bolýy tıis.
«Sondaı-aq demalysta fılmderdi shet tilinde kórgen paıdaly. Sýbtıtrler men qyzyqty sıýjet arqyly jańa sózder men sóz tirkesterin úırený jáne este saqtaý ońaı bolady.
Jazǵy demalys ýaqytyn densaýlyq pen bilim alý úshin paıdaly ótkize otyryp, siz ár qadam saıyn óz armanyńyzǵa jaqynyraq bolasyz: oqý oryndarynda jaqsy baǵalar/kórsetkishterge qol jetkizý, súıikti mamandyq alýǵa talpyný; óz aǵzańyzdy shynyqtyrý, t. b.
Tek óz jetistigińizdiń ustasysyz! Bul sizdiń densaýlyǵyńyz qanshalyqty myqty bolatynyna jáne siz qandaı bilim alatyndyǵyńyzǵa baılanysty. Al biz óz tarapymyzdan kúndelikti negizde bul úshin barlyq qajetti jaǵdaılardy jasaı beremiz», dep jazdy elorda ákimi.