Majarstannyń astanasy – Býdapeshtte dzıýdodan álem chempıonaty bastaldy. Jarystyń alǵashqy kúni erler men áıelder arasynda asa jeńil salmaq dárejeleri boıynsha medaldar sarapqa salyndy. Osy oraıda, bizdiń jigitterimizdiń erlegenin aıta ketýge tıispiz. Bastapqy básekelerde qarsylastarynyń barlyǵyn oısyrata utqan eki birdeı qandasymyz jartylaı fınalda kúsh synasý múmkindigine ıe boldy.
Sol múmkindikti 28 jastaǵy Ǵusman Qyrǵyzbaev utymdy paıdalandy. 60 kılo salmaqta synǵa túsken ol alǵashqy aınalymdarda chehııalyq Davıd Pýlkrabek, germanııalyq Morıs Plafkı jáne mońǵolııalyq Ýnýbold Lhkagvajamtsty jeńip, jartylaı fınalda Valıd Hııarmen kúresti. Eýropa chempıony degen ataǵy bar Fransııanyń saqa sportshysy qaısar qazaqtyń qarqynyna shydas bere almady. Al aqtyq saıysta Qyrǵyzbaev reseılik Iаgo Abýladzemen aıqasty. 24 jastaǵy Máskeý oblysynyń týmasy byltyrǵy Eýropa chempıonatynda kúmis alsa, bıyl qolaǵa qol sozǵan edi. Eki myqtynyń tartysynda Abýladzeniń asyǵy alshysynan tússe, Ǵusman álem chempıonatynyń kúmis júldegeri atandy.
Dál osy salmaqta Maǵjan Shamshadınniń de jeńis tuǵyryna kóterilýine tamasha múmkindigi boldy. Kezinde jastar arasynda álem chempıony atanǵan qandasymyz tusaýkeser kezdesýinde ýkraınalyq Artem Lesıýktiń aıaǵyn kókten keltirse, ile-shala Eýropa oıyndary men qurlyq birinshiliginiń qola júldegeri belgııalyq Iorre Ferstretennen basym tústi. Odan keıin álemdik reıtıngte altynshy orynda turǵan Eýropa chempıony, ıspanııalyq Fransısko Garrıgostan aılasyn asyrdy. Alaıda jartylaı fınalda Reseıdiń myqtysy Iаgo Abýladzege áli jetpedi. Sodan Shamshadın ázerbaıjandyq Haramat Gýseınovpen qola medal úshin beldesti. Qosymsha ýaqytqa deıin ulasqan bul beldesý Qap taýy qyranynyń paıdasyna sheshildi. Maǵjan besinshi orynda qalyp qoıdy.
О́kinishke qaraı, qyzdarymyz el senimin aqtaı almady. Alǵashqy eki aınalymnan esh qınalmaı ótken 48 kılo salmaqtaǵy Otgonseseg Galbadrah úshinshi kezeńde óziniń burynǵy otandasy, ári syralǵy qarsylasy Ýranseseg Muńbatynǵa ese jiberdi. Al Ábıba Ábýjaqynova tusaýkeser básekesinde koreıalyq Iý Jong Kanǵa jol berdi.