Dzıýdodan Býdapeshtte ótip jatqan álem chempıonatynyń alǵashqy kúni asa jeńil salmaqta kúresken Ǵusman Qyrǵyzbaev kúmis medaldy moınyna ilip, barsha qazaqstandyq jankúıerdi qýantsa, kelesi táýlikte Eldos Jumahanovqa aıryqsha senim artqan edik.
66 kılo salmaq dárejesinde beldesken Eldos Jumahanov jarysty óte keremet bastady. Alǵashqy aınalymda 2018 jylǵy Eýropa chempıony, 2017 jylǵy sol jarystyń kúmis júldegeri slovenııalyq Andrea Gambochty jolynyn yǵystyrǵan ol ile-shala aýstralııalyq Natan Kats jáne mońǵolııalyq Herlen Gandboldan aılasyn asyrdy. Bul básekelerdiń barlyǵynyń shıelenisti ótkeni sonshalyq, jeńimpazdy anyqtaý úshin qosymsha ýaqyt qajet boldy. Bul rette óziniń jankeshtiligi men tabandylyǵynyń arqasynda Jumahanov jeńiske jetti.
Shırek fınalda belorýssııalyq Dmıtrıı Mınkovtan basym túsken qazaq dzıýdoshysy jartylaı fınalda álemdik reıtıngtiń kóshbasshysy, bıylǵy jylǵy Eýropa chempıony ıtalııalyq Manýel Lombardomen aıqasty. Báseke barysynda jaraqat alǵanyna qaramastan qandasymyz baryn saldy. Biraq Apennın túbeginiń túlegi bizdiń jigittiń aldyn orap ketti. Odan keıin Eldos qola medal úshin talasýǵa tıis edi. Alaıda sonyń aldynda ǵana alǵan jaraqaty tym aýyr bolyp, Jumahanov tatamıge shyqpady. Sóıtip, jeńis Mońǵolııanyń ókili Iondonpernenleı Bashýýdiń enshisine jazylsa, qandasymyz besinshi orynda qalyp qoıdy.
Al 52 kılo salmaqtaǵy Nursulý Eralıeva óziniń tusaýkeser kezdesýinde Olımpııa oıyndary men álem chempıonatynyń qola júldegeri, Eýropa oıyndarynyń jeńimpazy, qurlyq chempıony belgııalyq Sharlın van Snıkti san soqtyrǵanymen, kelesi kezdesýde mońǵolııalyq Sosorbaram Lhagvasýrenge ese jiberdi.
Álem chempıonatynyń jeńimpazdary men júldegerleri
Áıelder
52 kılo: 1. Aı Shıshıme (Japonııa), 2. Ana Boks Peres (Ispanııa), 3. Fabın Kocher (Shveısarııa) men Gefen Prımo (Izraıl).
Erler
66 kılo: 1. Dzesıro Marýıama (Japonııa), 2. Manýel Lombardo (Italııa), 3. Iаkýb Shamılov (Reseı) pen Iondonpernenleı Bashýý (Mońǵolııa).