Qazaqstandyq tennısshiler Aleksandr Býblık pen Andreı Golýbev Rolan Garros týrnıriniń juptyq básekesinde jartylaı fınalǵa joldama aldy.
Qazaqstandyq jup Fransııa ashyq chempıonatynyń shırek fınalynda monakolyq Hıýgo Nıs pen germanııalyq Tım Pıýspen kúsh synasty. A.Býblık pen A.Golýbev matchty birden breıkpen bastady – 2:0. Keıinnen jerlesterimiz taǵy bir breık jasap, esepti 5:2-ge jetkizdi. Budan keıin monakolyq-germanııalyq jup esepti qysqartqanymen, set qazaqstandyqtardyń enshisinde ketti – 6:4. Jerlesterimiz ekinshi sette de 2:0 esebimen alǵa shyǵyp aldy. Match sońyna deıin osy basymdyqty saqtap qalǵan qazaqstandyq jup kezdesýdi sátti aıaqtady – 6:4. Báseke 1 saǵat 16 mınýtta aıaqtaldy. A.Býblık pen A.Golýbev fınalǵa shyǵý úshin ıspanııalyq Pablo Andýhar jáne Pedro Martınespen sheberlik baıqasady.
Sonymen qatar Elena Rybakına da juptyq synda týrnırdiń shırek fınalyna shyqty. Qazaqstandyq tennısshi reseılik Anastasııa Pavlıýchenkovamen birge úshinshi aınalymda amerıkalyq Nıkol Melıchar men nıderlandtyq Demı Shıýrsti 6:4, 6:3 esebimen jeńip, jarystyń tórtinshi aınalymynda oınaýǵa múmkindik aldy. Qazaqstandyq-reseılik jup jartylaı fınalǵa ótý úshin Polsha ókili Magda Lınett pen amerıkalyq Bernarda Peramen sheberlik baıqasady.