10 maýsymnan bastap oqshaýlaý rejımin buzǵan turǵyndarǵa 87 510 teńge aıyppul salynady. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova aıtyp berdi, dep habarlaıdy Egemen.kz.
«Ashyq» platformasynyń kómegimen anyqtalǵan ózin-ózi oqshaýlaý rejımin buzýshylarǵa ákimshilik jaza qarastyrylǵan. Osylaısha bul júıeler «Ashyq» jobasyna qatysatyn qoǵamdyq nysandarǵa barǵanda «qyzyl» mártebesi bar adamdardyń tirkelý faktisin rastaıdy. Iаǵnı karantındegi naýqas adamnyń sanıtarlyq-epıdemıologııalyq talaptardy saqtamaýy QR ÁQBtK-niń 802-babyna sáıkes ákimshilik quqyqbuzýshylyq týraly is qozǵaýǵa jáne oǵan ákimshilik jaza sharalaryn qoldanýǵa sebep bolady», dedi S. Beısenova elorda ákimdiginde ótken baspasóz máslıhatynda.
Spıkerdiń aıtýynsha, turǵyn óziniń juqtyrylǵan mártebesi týraly bile tura, oqshaýlaý rejımin buzsa jáne aınalasyndaǵylarǵa qasaqana juqtyrý qaýpin týdyrsa, QR ÁQBtK-niń 425-baby 1-bóligimen oǵan 30 AEK nemese 87 510 teńge mólsherinde ákimshilik aıyppul salynady. Bul qaǵıdalar 2021 jylǵy 10 maýsymda kúshine enedi.
«Qyzyl» nemese «sary» mártebesi bar turǵyndar megapolıstiń qoǵamdyq oryndarynda júrse, SOVID-19 tasymaldaýshylary bolyp sanalady, ımmýnıteti tómenderge, qarttar men balalarǵa jáne basqalaryna aýrý juqtyrady. Osylaısha Nur-Sultan qalasynyń «qyzyl» aımaqta bolý kezeńin ulǵaıtyp, syrqattanýdyń kúndelikti ósýine úles qosady», deıdi Sarhat Beısenova.