Qaraǵandy oblysynyń Polısııa departamenti «Gornıak» bazarynda er adamnyń ólimi boıynsha taǵaıyndalǵan sot-medısınalyq saraptama qorytyndysyn jarııalady. Oǵan sáıkes, ólim elektr togynyń soǵýy saldarynan bolǵan, dep habarlaıdy Egemen.kz.
«9 maýsymda oryn alǵan jazataıym oqıǵa faktisi boıynsha QR QK 306-baby «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetterdi kórsetý» boıynsha qylmystyq is qozǵaldy. Sot-medısınalyq saraptama jábirlenýshiniń ólimi elektr togynyń soǵýy saldarynan bolǵanyn anyqtady», dep habarlady Qaraǵandy oblysy PD baspasóz qyzmetinen.
Sondaı-aq qala ákimdigi jýrnalısterdiń «Osy ýchaskede qandaı da bir jóndeý jumystary júrgizildi me?» degen suraǵyna da jaýap berdi.
«Búgingi tańda áleýmettik pavılon aýmaǵynda (Gornıak aıaldamasy) avtomobıl jolynyń oń jaǵynda merdiger uıym eshqandaı jumys júrgizbedi. Sondaı-aq pavılon men jol tóseý jobasy arasynda elektr kabelderi tabylmady», dep habarlady Qaraǵandy qalasy ákimdiginiń baspasóz qyzmetinen.
Aıta keteıik, jergilikti saýdagerlerdiń (kýágerler) sózinshe, er adamdy tok soqqannan soń jerge kómip tastaǵan. Keıinnen ashyq jatqan symdardyń ústine saýdagerler aǵash tasyp, jamap qoıǵan.