Qazaqstan óńirlerinde Halyqaralyq Olımpıada kúnine arnalǵan sporttyq sharalar bastaldy, dep habarlaıdy Egemen.kz.
Bul mereke jyl saıyn 23 maýsymda atap ótiledi. Qazaqstan Ulttyq Olımpıadalyq komıteti barlyq qazaqstandyqtardy múmkindiginshe belsendi bolyp, olımpıadalyq qundylyqtardy zerttep, jańa sport túrlerimen tanysý úshin búkil maýsymdy olımpıadalyq qundylyqtarǵa arnaıdy. Barlyq is-sharalar halyqaralyq olımpıadalyq qozǵalystyń «Bárimiz birge: jyldam, bıikke, myqty» jańa uranymen ótedi.
Bes olımpıadalyq saqına bes qurlyqty beıneleıtini sııaqty, elimizdiń sporttaǵy birligin sıpattaý maqsatynda Qazaqstannyń bes aımaǵynda merekelik estafeta ótedi.
Ulttyq Olımpıada komıtetiniń qoldaýymen merekelik estafetany birinshi bolyp Shyǵys Qazaqstan oblysy bastady. Elimizde jeńil atletıkanyń negizgi aımaǵy bolyp sanalatyn О́skemende balalar arasynda jeńil atletıkadan jarys ótti. Jeńil atletıkanyń tańdalýy kezdeısoqtyq emes. Sebebi, jeńil atletıkadan Olımpıada chempıony jáne birneshe dúrkin júldegeri Olga Rypakova osy aımaqtan, Shyǵys Qazaqstan oblysynan shyqqan.
Olga Rypakova atyndaǵy jeńil atletıka manejinde 60-tan astam jas sportshylar 50 jáne 200 metrge júgirý, uzyndyqqa sekirý jáne basqa starttarda baq synasty. Rypakova ortalyǵynda 600-den astam balalar men jasóspirimder 24 jattyqtyrýshynyń jetekshiligimen sportpen tegin aınalysady. Sondaı-aq, 2021 jyly naýryzda munda jeńil atletıka bóliminen basqa ústel tennısi bólimi de ashyldy.
– Bizdiń balalar óte daryndy. Bizben birge jattyǵatyndardyń arasynda sport sheberleri, halyqaralyq jarystardyń júldegerleri, jastar arasyndaǵy álem jáne Azııa chempıonatynyń qatysýshylary. Olımpıada chempıony Olga Rypakova osynda jattyǵady, balalar onyń daıyndyǵyn, jattyǵý barysyn kóredi de jigerlenip, sondaı bolýǵa talpynady. Ásirese, jańadan kelgen balalar erekshe yntalanyp qalady. Biz Olımpıada kúnin dástúrli túrde jylda atap ótemiz. Tek byltyr karantınge baılanysty jarys ótkizilmedi, áıtpese, balalar bul merekeni jylda taǵatsyzdanyp kútip, erekshe daıyndalady, - dedi sport sheberi, joǵary sanatty jattyqtyrýshy Vladıslav Leshın.
– Árıne, bárimiz Olga Rypakova sııaqty Olımpıadaǵa barýdy armandaımyz. Sondyqtan biz jattyǵýdy úzbeı, tynbaı daıyndalamyz. Osy ortalyqty salǵandarǵa jáne jattyqtyrýshylarymyzǵa orasan zor alǵysymyzdy aıtamyz Barlyǵyn Halyqaralyq Olımpıada kúnimen quttyqtaımyn, - dedi jarysqa qatysýshy Jamılıa Dýanova.
Búgingi sporttyq sharanyń basty qonaǵy jaqynda Tokıo Olımpıadasyna attanatyn 2012 jylǵy Londonda ótken Jazǵy Olımpıada oıyndarynyń chempıony, álem chempıony Olga Rypakova boldy.
– Sportshylarmen sóılesip, kezdesý qashanda óte áserli, jaǵymdy emosııa syılaıdy. Balalar kishkentaı, jas ekendigine qaramastan maqsattary aıqyn, olımpıadalyq rýhqa ıe jáne jeńiske degen umtylysy zor. Men olardy úlken bolashaq kútip turǵany anyq. Sebebi, olar sportty minez qalyptasa bastaǵan kezde bastady. Dál osyndaı ynta men erik-jigerdi, tózimdilik pen senimdiliktiń arqasynda balalardy óz múmkindikterin múlt jibermeıtin, eshteńeden jasqanyp,tek jetistikke jeteleıtin jarqyn bolashaq kútip turǵanyna nyq senimdimin, - dedi Olga Rypakova.
Barlyq balalarǵa Halyqaralyq Olımpıada komıtetiniń basshysy Tomas Bah pen elimizdiń Ulttyq Olımpıadalyq komıtetiniń prezıdenti Tımýr Qulybaevtyń qoldary qoıylǵan Olımpıada kúnine qatysqany úshin sertıfıkattar tabystaldy.
Shyǵystan, О́skemennen keıin Olımpıada kúni aıasynda soltústik óńir estafetany jalǵastyrady. 19 maýsym kúni Olımpıada chempıony Aleksandr Vınokýrov, Azııa altynynyń tórt dúrkin ıegeri, velosporttan Qazaqstan quramasynyń úzdigi Alekseı Lýsenkonyń qatysýymen Petropavlda velosherý ótedi. Ońtústik astana sanalatyn Almaty qalasynda 20 maýsym kúni sporttyq quzǵa órmeleýden oıyndar, batys óńirde, atap aıtqanda Aqtaýda 21 maýsymda boks pen dzıýdo boıynsha sheberlik sabaqtary ótkiziledi.
Estafeta 23 maýsym kúni el ortalyǵy elordada aıaqtalady. Trıatlon saıabaǵynda basketbol, strıtbol oıyndary, tekbol jarysy jáne kanoede úlken sporttyq festıval ótedi. Sonymen qatar, dástúr boıynsha Qazaqstannyń UOK pen sportshylar elimizdiń ár túkpirinde osy kúni dúnıege kelgen sábılerdi quttyqtap, olarǵa jaqsy tilekter jazylǵan syılyqtar men hattar tabystaıdy.