Jetisýdyń tabıǵı ereksheligi men óńirdiń logıstıkalyq múmkindigi ınvestorlardyń nazaryn únemi aýdaryp keledi. Búginde oblysta 592 joba osy jeke kompanııalardyń qarjysyna júzege asýda. Iаǵnı 2021-2030 jyldarǵa arnalǵan ınvestısııa qorjynyna jalpy quny 5,5 mlrd teńge bolatyn qarjy salynady.
Nátıjesinde 45 myń jumys orny jańadan ashylýy tıis. Sonyń ishinde 66 joba bıyl tolyq aıaqtalyp, eńbek naryǵyna 3500 adamǵa suranys artpaq. Buǵan 112,8 mlrd teńge jumsalýda. Endi oblystyń ınvestısııalyq qorjynyna Dúnıejúzilik banktiń qarjysy quıylatyn kún jaqyn. Bul jaıynda alpaýyt qarjy uıymynyń Qazaqstandaǵy turaqty ókili Jan-Fransýa Martonnyń Jetisýǵa jasaǵan resmı sapary barysynda aıtyldy.
– Búginde el kóleminde transulttyq kompanııalardyń qatysýymen 16 joba iske asyp jatyr. Al onyń ishindegi 9 joba bizdiń Almaty oblysynda. О́ńir agroónerkásiptik salada, qant qyzylshasy, soıa, júgeri ósirýde kóshbasshy orynda tur. Aýyl sharýashylyǵy ónimderin óńdeýde irgeli jobalar bar. Balamaly energetıkada da jemisti jumystar jasalyp jatyr. Biz sizdermen osy salalarda, sol sııaqty týrızm, turǵyn úı-kommýnaldyq sharýashylyq, sonyń ishinde gazdandyrý, kósheni jaryqtandyrý, káriz júıelerin jańǵyrtý, sonymen birge ırrıgasııalyq júıelerdi qalpyna keltirý baǵyttarynda yntymaqtastyq ornatýǵa beıildimiz. Jaqyn aralyqta Taldyqorǵanda JEO salý josparda bar. Bul da – mańyzdy ári qajetti joba. Alda Dúnıejúzilik bank mamandarymen naqty baǵytymyzdy birlesip anyqtap, jemisti eńbek etýge tájirıbemiz jetedi dep oılaımyn, – deıdi oblys ákimi Amandyq Batalov.
Jalpy, Dúnıejúzilik banktiń qoldaýymen oblysta buǵan deıin de birqatar joba júzege asqan eken. Onyń ishinde «Almaty-Qorǵas» jolynyń ınfraqurylymdyq jobasy, 2 mektep pen balabaqshany qamtıtyn energııa tıimdiligin arttyrý jobasy, sol sııaqty jastardy qoǵamdyq ómirge tartýǵa, olardyń ómirlik mashyqtaryn damytýǵa baǵyttalǵan jastar korpýsynyń jobasy bar. Al bank ókilderi endi yntymaqtastyqty odan ári damytý maqsatynda bilim berý, sıfrlandyrý, jol ınfraqurylymy, ırrıgasııa, áleýmettik salalarda, ásirese, memlekettik-jekemenshik áriptestik aıasyndaǵy jobalardy qarjylandyrýǵa daıyn kórinedi.
– Biz Almaty oblysynyń aýmaǵynda birlese jumys isteýge qyzyǵýshylyq bildirip otyrmyz. Buǵan deıin biz el Úkimeti arqyly ǵana iskerlik baılanys ornattyq. Endi oblys basshylyqtarymen tikeleı jumys isteý úshin birqatar qujattarǵa ózgerister engizip jatyrmyz, – deıdi óz kezeginde qarjy uıymynyń Qazaqstandaǵy turaqty ókili Jan-Fransýa Marton Jan-Fransýa Marton.
Sondaı-aq álemge áıgili qarjy uıymy ókilderiniń kezdesýine qatysqan Halyqaralyq qarjy korporasııasynyń Qazaqstandaǵy keńsesiniń basshysy Ekaterına Bendjamın de Almaty oblysymen aradaǵy áriptestik baılanystaryn jandandyrýǵa yqylasty ekenin aıtty.
– Biz oblystyń áleýmettik-ekonomıkalyq damýyna oń yqpal etetin uzaq merzimdik jobalardy, sonyń ishinde qaldyqtardy joıý jáne ırrıgasııa baǵyttaryndaǵy jobalardy birge atqarýǵa daıynbyz, – dep atap ótti Halyqaralyq qarjy korporasııasynyń Qazaqstandaǵy keńsesiniń basshysy Ekaterına Bendjamın.
Aıtpaqshy, bıyl Memleket basshysy Qasym-Jomart Toqaev «Qazaqstan Respýblıkasy men Halyqaralyq qarjy korporasııasy arasyndaǵy Qazaqstan Respýblıkasynda ofıster qurý jáne olardyń qyzmeti týraly kelisimdi ratıfıkasııalaý týraly» Qazaqstan Respýblıkasynyń zańyna qol qoıǵan bolatyn. Ekijaqty iskerlik baılanystyń jemisi endi Jetisý jerinde nátıje bermek.