Sońǵy álem chempıonatynyń kúmis júldegeri atanǵan Horvatııa Eýropa chempıonatyn jeńilispen bastady. Osydan úsh jyl buryn Reseıde uıymdastyrylǵan álemdik dop dodasynda atoı salyp, fınalǵa deıin jetken «Shaqpaq jeıdeli eldiń» quramasy bıylǵy Eýronyń tusaýkeser kezdesýinde Anglııadan jeńilip qaldy.
Chempıonattyń rekordy jańardy
Londondaǵy «Ýemblı» stadıonynda ótken kezdesý 1:0 esebimen aǵylshyndardyń paıdasyna aıaqtaldy. Oıyndaǵy jalǵyz ári jeńis golyn matchtyń 57-mınýtynda «Manchester Sıtı» klýbynyń oıynshysy Rahım Sterlıng saldy. Osylaısha Anglııa quramasy óz tarıhynda tuńǵysh ret Eýropa chempıonatyn jeńispen bastady. Gol avtory Sterlıng osy kezdesýdiń úzdik fýtbolshysy atansa, Anglııa quramasynyń taǵy bir jartylaı qorǵaýshysy Djýd Bellıngem Eýropa chempıonatynyń fınaldyq kezeńinde oınaǵan eń jas fýtbolshy degen ataqqa ıe boldy. Ol alańǵa 17 jas 349 kún tolǵanda shyqty. Al buǵan deıingi rekord Nıderland oıynshysy Ietro Vıllemske tıesili bolatyn. Vıllems 2012 jyly Polsha men Ýkraınada uıymdastyrylǵan kári qurlyq birinshiliginde oınaǵanda 18 jasqa tolǵan edi.
Eń qart surmergen
S tobyndaǵy alǵashqy oıynda Aýstrııa quramasy Soltústik Makedonııadan basym tústi. Rýmynııa astanasy – Býharesttegi «Nasıonal» stadıonyndaǵy matchta 3:1 esebi tirkeldi. Birinshi taımnyń 18-mınýtynda aýstrııalyq Shtefan Laıner esepti ashqanymen, arada 10 mınýt ótkende osy chempıonattyń eń qart oıynshysy Goran Pandev tarazy basyn teńestirip ketti. Tablodaǵy teń esep oıynnyń 78-mınýtyna deıin saqtalyp turdy. Mıhael Gregorıch 78-mınýtta Aýstrııany esepte alǵa shyǵarsa, Marko Arnaýtovıch 89-mınýtta kezdesýdiń núktesin qoıdy.
Osylaısha Goran Pandev Soltústik Makedonııanyń Eýro dodadaǵy tuńǵysh golyn soqty. Sonymen qatar Pandev (37 jas 321 kún) aýstrııalyq Ivısa Vastıchten (38 jas 257 kún) keıin Eýropa chempıonatynda gol soqqan eń qart ekinshi oıynshy atandy.
Eýrodaǵy altynshy jeńilis
Amsterdamdaǵy «Iohan Kroıff Arena» stadıonynda ótken bul toptaǵy ekinshi oıynda Nıderland pen Ýkraına quramalary baq synady. О́te tartysty kezdesýde Nıderland quramasy 3:2 esebimen jeńiske jetti. Bir qyzyǵy, bes goldyń bári ekinshi taımda soǵyldy. Nıderland fýtbolshylarynan Jorjıno Veınaldým (52-mınýt), Vaýter Vegorst (58-mınýt) jáne Denzel Dıýmfrıs (85-mınýt) mergendigimen kózge tússe, Ýkraına quramasynan Andreı Iаrmolenko (75-mınýt) men Roman Iаremchýk (79-mınýt) óz attaryn tabloǵa jazdyrtty.
Bul – Ýkraına quramasynyń Eýropa chempıonatyndaǵy qatarynan altynshy jeńilisi. Andreı Shevchenko shákirtteri sońǵy ret Eýroda 2012 jyly Shvesııa quramasynan basym túsken bolatyn. Al odan keıingi bes oıynda (Fransııa jáne Anglııa, Eýro-2012; Germanııa, Soltústik Irlandııa, Polsha, Eýro-2016) jeńilistiń kermek dámin tatty.