Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy boldy. Vladımır Volkovtyń tóraǵalyq etýimen ótken jıynda senatorlar «Memlekettik feldegerlik baılanys týraly» zań jobasyn talqylady, dep habarlady Palatanyń baspasóz qyzmeti.
Qujat memlekettik feldegerlik qyzmettiń quqyqtyq mártebesin arttyrýǵa jáne el ishinde de, úkimetaralyq ózara qarym-qatynastarda da tıimdi feldegerlik baılanys júıesin qalyptastyrýǵa baǵyttalǵan. Zań jobasynyń jekelegen erejelerinde kadr quramy, qyzmet ótkerý tártibi men sharttary, eńbek qatynastary, zeınetaqymen qamsyzdandyrý máseleleri retteledi. Sondaı-aq feldegerlik baılanys qyzmetkerleriniń jeke qaýipsizdigine, quqyqtyq qorǵalýyna jáne jaýapkershiligine kepildikter belgilenetin bolady. Sala qyzmetkerleri men olardyń otbasy múshelerine áleýmettik kepildikter kózdelip otyr. «Osy saladaǵy qyzmetkerlerdiń jumysynyń mańyzdylyǵy men qaýiptiligin eskere kelip memleket tarapynan qyzmet babymen qonys aýystyrýda jeke zattaryn tasymaldaý, ushaqta júrip qyzmettik mindetin atqaratyndardyń jalaqysyna qosylatyn tólemaqy, zeınetke shyǵatyn kezdegi beriletin ústeme tólemaqy, olardyń jáne otbasy músheleriniń densaýlyǵy men múlkine keltirilgen zalaldy óteý syndy arnaýly áleýmettik kepildikter usynylady», dedi Nurlan Beknazarov.
Otyrysta senatorlar, sondaı-aq «Qazaqstan Respýblıkasynyń keıbir zańnamalyq aktilerine memlekettik feldegerlik baılanys jáne ishki ister organdarynyń qyzmeti máseleleri boıynsha ózgerister men tolyqtyrýlar engizý týraly» zań jobasyn da qarady.
«Memleket basshysynyń Joldaýyndaǵy ýchaskelik polısııa ınspektorynyń mártebesin zańdy túrde arttyrýǵa qatysty aıtylǵandardy iske asyrý aıasynda olarǵa tıimdi jumys isteýge qajetti ókilettikterdi bere otyryp «QR Ishki ister organdary týraly» Zańǵa tıisti túzetýler ázirlendi. Olarǵa bekitilgen ýchaskede quqyq buzýshylyqtardy jasaýǵa yqpal etetin sebepter men jaǵdaılar anyqtalǵan kezde osyndaı sebepter men jaǵdaılardy joıý jóninde jeke jáne zańdy tulǵalarǵa sharalar qabyldaý qajettiligi týraly óz betinshe usynystar engizý quqyǵyn berý arqyly ýchaskelik ınspektorlardyń mártebesi arta túsedi», dedi V.Volkov.
Zań jobasyna sáıkes, ýchaskelik polısııa ınspektorlary bólimsheleriniń quramyna ýchaskelik polısııa ınspektorlarynyń kómekshileri engiziletin bolady. Al azamattyq qorǵaý organdary Ishki ister organdarynyń júıesinen shyǵarylady, soǵan baılanysty azamattyq qorǵaý salasyndaǵy memlekettik baqylaý IIO quzyretinen shyǵarylady.
Odan basqa, «Azamattyq qorǵaý týraly» zańǵa memlekettik órtke qarsy qyzmet organdaryna órtke baılanysty qylmystyq quqyq buzýshylyqtar týraly ister boıynsha anyqtaý júrgizýge ókilettik berýdi kózdeıtin túzetý engiziletin bolady. Zań jobalary Palatanyń qaraýyna jiberildi.