Halyqaralyq Olımpıada kúnin Qazaqstanda atap ótý estafetasyn Soltústik Qazaqstan óz moınyna aldy. Petropavlda jappaı velosherý ótti. Velosherýdi Olımpıada chempıony Aleksandr Vınokýrov bastady, dep habarlaıdy Egemen.kz.
Bul mereke jyl saıyn 23 maýsymda atap ótiledi. Atalǵan mereke Qazaqstanda 28-shi ret toılanbaq. Osyǵan oraı, Ulttyq Olımpıadalyq komıtet búkil maýsymdy olımpıadalyq qundylyqtarǵa arnaıdy. Barlyq is-sharalar halyqaralyq olımpıadalyq qozǵalystyń «Bárimiz birge: jyldam, bıikke, myqty» uranymen ótedi.
Vınokýrov atyndaǵy sport saraıynan júzden astam veloshabandoz velosherýge shyqty. Eresekter men balalar qala kóshelerimen 10 shaqyrymdaı júrip ótti.
Qatysýshylarǵa Olımpıada kúnine qatysqany úshin Halyqaralyq Olımpıada komıtetiniń basshysy Tomas Bah pen eldiń Ulttyq Olımpıadalyq komıtetiniń prezıdenti Tımýr Qulybaev qol qoıǵan sertıfıkattar tabystaldy.
«Men osynda kelgenime jáne sportty súıetin jerlesterimmen kezdeskenime qýanyshtymyn. Bul kúnderi velosporttan Qazaqstan chempıonaty ótip jatyr, sondyqtan Petropavldy dál qazirgi tańda velosıpedshiler mekeni dep ataýǵa bolady. Búgingi sharaǵa qatysqandar qatarynda bolashaq olımpıadashylardyń bar ekenine senimdimin», deıdi Olımpıada chempıony Aleksandr Vınokýrov.
Olımpıada kúni aıasynda merekeni atap ótý 20 maýsymda Almatyda sporttyq quzǵa órmeleý boıynsha saıyspen jalǵasady. 21 maýsymda Aqtaýda boks jáne dzıýdodan sheberlik synyptary ótkizilse, 23 maýsymda elordada basketbol oıyndary, strıt vorkaýt, kanoede esýden jáne tekboldan saıystar uıymdastyrylatyn sporttyq shara ótedi.