Almaty qalasynyń Memlekettik qýyrshaq teatry búginde birneshe býyn jastardy tárbıelep, baldyrǵandardyń jan-jaqty azamat bolyp qalyptasýyna óz úlesin qosyp keledi. 86 jyldyq tarıhy bar teatr taıaq qýyrshaqtan bastap, zaman aǵymyna saı kúrdeli marıonetkalar, sońǵy úlgidegi tehnıkalyq-lazerli kórkemdeýlermen óner kórsetip júr. Teatr ujymy maýsym aıynyń 7-13 kúnderi aralyǵynda Tatarstan Respýblıkasy, Qazan qalasynda ótken «Naýrýz» túrki halyqtarynyń festıvalinde «Men bir jumbaq adammyn... Abaı» (rej.: A.Zaısev) spektaklimen onlaın formatta baq synady.
Ulttyń uly oıshyly Abaı Qunanbaıulynyń qara sózderine negizdelgen qoıylym teatr synshylary men festıvalǵa qatysýshylardyń tarapynan joǵary baǵaǵa ıe boldy.
«Naýrýz» – Reseı Federasııasyna qarasty ulttyq teatrlar arasyndaǵy jalǵyz aýqymdy teatr festıvali. Festıvalge Qazaqstan, Qyrǵyzstan, Ázerbaıjan, Túrikmenstan, О́zbekstan, Tájikstan jáne Reseıdiń ulttyq respýblıkalarynan 25 teatr qatysty. Dodaǵa qatysýǵa ótinim jibergen elimizdegi 33 teatrdyń ishinen halyqaralyq synshylar komıssııasy iriktegen Qýyrshaq jáne Qallekı teatrlary saraptamadan ótip, arnaıy shaqyrtý alǵan.
Sondaı-aq óner ordasy aldaǵy 22-30 maýsym kúnderi aralyǵynda Reseıdegi Halyqaralyq «KÝKART» qýyrshaq teatr festıvaline jol tartpaq. Úzdikter bas qosatyn óner ordalarynyń qatarynda Memlekettik qýyrshaq teatrynyń atynan «Romeo men Djýletta» (rej.D.Jumabaeva) qoıylymy qatysady. Spektakldiń taqyryby men kórermenge berer oıy, mazmuny men mańyzy erekshe.
Aıta keteıik, «Romeo men Djýletta» – teatr repertýaryna 2019 jyldyń 24 qańtarynda qosylǵan eresekterge arnalǵan spektaklderdiń biri. Qoıylym sulýlyq pen tazalyqqa tabynýdan, albyrttyǵy jarasqan eki ǵashyqtyń taǵdyry arqyly áýlet pen tobyrdyń bitpes daýyn arqaý etýden týyndaǵan. Jaryqqa shyqqaly birneshe Halyqaralyq teatr festıvalinde baq synaǵan spektakl qýyrshaq teatrynyń jańa baǵyttaǵy batyl tájirıbelerin kórsetip keledi.
KÝKART halyqaralyq qýyrshaq festıvali – 1993 jyldan beri ótkizilip kele jatqan qaıyrymdylyq baǵyttaǵy kommersııalyq emes jalǵyz festıval. Bıyl festıvalge 27 jyl tolady. Ol kóp ultty Reseıdiń ártúrli aımaqtaryndaǵy qýyrshaq teatrlaryn biriktiredi. Túrli elder men halyqtar arasyndaǵy mádenı kópirge aınalǵan bıylǵy festıvalda Reseı Federasııasynyń quramyndaǵy 10-nan astam teatr ujymymen qatar, Izraıl, Germanııa, Bolgarııa, Fınlıandııa, Estonııa, Qytaı, Serbııa teatrlary óner jarystyrady. Mádenı jobanyń baǵdarlamasy dástúrli úsh baǵyttan turady: negizgi, arnaıy jáne klýbtyq qoıylymdar. Memlekettik qýyrshaq teatrynyń «Romeo men Djýletta» qoıylymy negizgi baǵdarlamaǵa engen. Spektakl 27 maýsym kúni Zazerkale teatrynyń sahnasynda qoıylady.
Teatr festıvaliniń basty maqsaty – qýyrshaq teatry óneriniń álemdik keńistikte damý jolyn saqtaı otyryp, ár eldiń repertýar saıasatymen keńinen tanysý, óner oshaqtarynyń shyǵarmashylyq tynysyn baǵamdaý.
Festıval aıasynda qoıylymdardyń kórsetiliminen tys festıval qatysýshylarynyń arasynda dóńgelek ústelder men sheberlik saǵattary, t.b. is-sharalar uıymdastyrylmaq.