Atyraý qalalyq polısııa basqarmasynda 20 otbasylyq jup jumys istep júr. Olar qoǵamdyq tártip pen qaýipsizdiktiń saqtalýy úshin qyzmette júrip, baqytty januıa qurǵan, dep habarlaıdy Egemen.kz.
Oblystyq polısııa departamenti baspasóz qyzmetiniń málimetinshe, solardyń biri – Álibek pen Baǵdat Qaıyrǵalıevterdiń otbasy.
«Oral qalasyndaǵy Qazaqstan ınnovasııalyq jáne telekommýnıkasııalyq ýnıversıtetin bitirgen Álibek Qaıyrǵalıev 2016 jyly ishki ister organyna jumysqa ornalasypty. Al, Baǵdat – Ishki ister mınıstrligi Sh.Qabylbaev atyndaǵy Qostanaı akademııasynyń túlegi. Ekeýi bir-birimen osy salada kezdesken», dep habarlady departamenttiń baspasóz qyzmeti.
Qazir ekeýi de Atyraý qalalyq polısııa basqarmasynyń kámeletke tolmaǵandar isteri jónindegi ýchaskelik polısııa ınspektory bolyp jumys isteıdi. Olar byltyr otaý quryp, endi tuńǵysh sábıin kútip júr.
«Bizdiń atqaratyn qyzmetimiz de, kózqarasymyz ben qyzyǵýshylyǵymyz da bir arnaǵa toǵysyp jatady. Kúndelikti atqarǵan jumysymyzdy taldap, bir-birimizge keńesimizdi beremiz. Otbasylyq juptyń bir salada jumys istegeniniń artyqshylyǵy kóp. О́ıtkeni, jumys babynda bir-birimizge kómektesip, qınalǵan sátte qoldaý kórsetýge múmkindik bar», deıdi Álibek Qaıyrǵalıev.
Jaqynda Ishki ister mınıstri Erlan Turǵymbaevtyń buıryǵymen polıseı jigit «Quqyq tártibin qamtamasyz etýge qosqan úlesi úshin» medalimen marapattaldy. О́ıtkeni, ol kiltteýli páterde jalǵyz qalǵan jasóspirimdi qutqarǵan bolatyn.