Mańǵystaýda velosıped teýip júrip qolyn syndyryp alǵan 8 jastaǵy balany ata-anasy synyqshyǵa aparyp emdetemiz dep, bir qolsyz qaldyrǵan. Bul týraly áleýmettik jelilerde aqparat tarady, dep habarlaıdy Egemen.kz.
«Osydan 12 kún buryn balam velosıped teýip júrip, qolyn syndyryp alady. Sodan úıge jaqyn jerge synyqshyǵa baryp, qolyn saldyrdyq. Olar «úsh kúnnen keıin kelińiz, qaıtadan jibin aýystyramyz» dep aıtty. Úsh kúnnen keıin aýystyryp berdi, sosyn 21 kúnnen keıin kelýim keregin aıtty. Osy aralyqta balanyń qoly isip, kógerdi. Ol «ýaıymdamańyz» dedi. Úıge kelgen soń ulymnyń qoly isip, kógerip, qyzardy. Birer kúnnen soń, qolynyń ushy jáımendep qaraıa bastady. Balam ózin jaqsy sezinip, tábeti jaqsy bolyp júrgendikten bári jaqsy dep oıladyq. Bes-alty kún ótkennen keıin bala saýsaqtaryn sezbeıtin boldy. Qaıtadan synyqshyǵa aparsam «Bulaı bolýy qalypty, saýsaqtarynyń basyn maımen maılańyz» dep qaıtaryp jiberdi», deıdi balanyń anasy.
Mańǵystaý oblystyq balalar aýrýhanasynyń hırýrgi Qurman Qaıranov qazaqstandyqtardy bilikti dárigerlerge qaralýǵa shaqyrdy.
«Bizdiń balalar aýrýhanasynyń travmotologııa bólimine 17 kúni 8 jastaǵy bala tústi. Aýrýhanaǵa túskenge deıin bilegin syndyryp alǵan, emshiler qolyna tyǵyz tamshy salyp tastaǵan. Bizge kelgende balanyń jaǵdaıy óte aýyr boldy, qolynyń basy qaraıyp, eti ólip qalǵan, jan joq. Sodan keıin biz barlyq ortalyqqa shyqtyq, konsýltasııa jasadyq, tamyrly hırýrgterge kórsettik. Báriniń aıtqan tujyrymdamasy – ampýtasııa. 20 maýsym kúni ota jasaldy. Synyqshy, emshige baryp em alǵanda, synǵan súıek árdaıym ornyna kele bermeıdi. Qazir 21 ǵasyr, zaman, tehnologııa damyp jatyr. Sondyqtan naýqasty eń birinshi ýaqytyly aýrýhanaǵa jetkizińizder», dedi maman.