Almaty oblysy Esik qalasynda Qazaqstanda joıylyp ketý qaýpi bar sırek kezdesetin janýar vıdeoǵa túsirildi. Jaıra (kirpiksheshenniń bir túri) qala kósheleriniń birinde túsirilgen. Munyń ózi sırek kezdesetin jaǵdaı. Bul týraly ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva málimdedi, dep habarlaıdy Egemen.kz.
Vıdeo avtorynyń málimeti boıynsha, erekshe janýardy ol Esiktegi Abaı kóshesinde kórgen.
Áleýmettik jeli qoldanýshylary tańdanystaryn jasyra almaı janýardyń qaıdan kelgenin, qystan qalaı aman shyqanyn aıtyp talqylap jatyr. Alaıda Qazaqstannyń Ekologııa, geologııa jáne tabıǵı resýrstar mınıstrligi jabaıy jaıra Qazaqstanda burynnan bar ekenin aıtty. Sondyqtan ony qutqarý maqsatynda áreket jasaýdyń qajeti joq. Degenmen janýardyń taýly jerden adamdar arasyna túsýi sırek kezdesedi.
«Úndi jaırasy - bul kemirgishter otrıadyna kiredi. Qazaqstan faýnasynda bul otrıadtyń jalǵyz túri bar. Ol Ońtústik Mańǵyshlaqta, Talas, Qyrǵyz jáne Ile Alataýy men Qarataýda, Shý-Ile taýlarynda kezdesedi. Almaty oblysynyń aýmaǵynda Ile Alataýynda kezdesedi. XX ǵasyrdyń birinshi jartysynda Almaty qalasynyń mańynda keń taraǵan. Taralý aımaǵy Túrgen ózeniniń alqabyna deıin jetedi. Biraq antropogendik faktor (adam faktory) olardy tarıhı aýmaǵynan yǵystyrǵan. Ile-Alataý memlekettik ulttyq tabıǵı parkiniń derekteri boıynsha, Ile Alataýy men oǵan irgeles jatqan aýmaqtardyń sheginde úndi jaırasynyń sany 30 bastan aspaıdy», dedi Samal Ibraeva.
Jaıra Qazaqstannyń Qyzyl kitabyna sırek kezdesetin jáne joıylyp bara jatqan janýar túr retinde engizilgen.
«QR QK-nyń 339-babyna sáıkes quryp ketý qaýpi bar jáne sırek kezdesetin janýarlar men ósimdikterge zııan keltirgenderge qylmystyq jaýapkershilik kózdelgen. Bap sanksııasy múlkin tárkilep, úsh myń aılyq eseptik kórsetkishke deıin aıyppul salýdy, ne sol mólsherde túzeý jumystaryna, ne segiz júz saǵatqa deıingi merzimge qoǵamdyq jumystarǵa tartýdy, ne úsh jylǵa deıingi merzimge bas bostandyǵyn shekteýdi, ne sol merzimge bas bostandyǵynan aıyrý jasasyn kózdeıdi. Sondaı-aq, belgili bir laýazymdardy atqarý nemese belgili bir qyzmetpen aınalysý quqyǵynan bes jylǵa deıingi merzimge aıyrady», dedi Ekologııa, geologııa jáne tabıǵı resýrstar mınıstrligi ókili.