Elordadaǵy Qazmedıa ortalyǵynda baspasóz, radıo, ınternet-jýrnalıstıka salasyndaǵy URKER-2021 ulttyq báıgesiniń jeńimpazdary marapattaldy. Jeńimpazdarǵa estelik músinshe jáne bir mıllıon teńge mólsherindegi aqshalaı syılyq tabys etildi.
Saltanatty rásimdi ashqan Aqparat jáne qoǵamdyq damý mınıstri Aıda Balaeva jıynnyń buqaralyq aqparat quraldary qyzmetkerleriniń kúni qarsańynda uıymdastyrylǵanyn atap ótti.
«El táýelsizdiginiń 30 jyly ishinde memleketimizben birge otandyq medıa salasy da jańarý, damý kezeńinen ótti. Táýelsizdiktiń alǵashqy jyldary elimizde tek 407 aqparat quraly, sonyń ishinde 2 telearna ǵana bolsa, qazir olardyń sany tórt jarym myńnan asady.
Bir ǵana Qazaqstan telearnasy búginde quramyna 5 respýblıkalyq, 14 óńirlik telearna, 4 radıo enetin úlken Ulttyq korporasııaǵa aınaldy. Ulttyq medıa tarıhynda tuńǵysh ret balalar arnasy – Balapan, sporttyq arna – Qazsport, kórermenniń kózaıymy – Abai arnasy iske qosyldy.
Quramyna táýlik boıyna jańalyqtar usynatyn «Habar 24», 10 mıllıonǵa jýyq kórermeni bar «Elarna», álemniń 120-dan astam eline habar taratatyn QazaqTV arnalary engen «Habar» agenttigi búginde iri medıa ortalyq», dedi vedomstvo basshysy.
Mınıstrdiń aıtýynsha, el aýmaǵynda 181 telearna, 79 radıo, 790 aqparattyq agenttik bar. Osyndaı qaınaǵan aqparattyq keńistik ortasynda shyńdalǵan jýrnalıster arasyndaǵy báseke qashanda joǵary.
«Bıyl besinshi ret ótkizilip otyrǵan «Úrker» báıgesi – baspasóz, radıo, ınternet jáne foto jýrnalıstıka salasyndaǵy jańa esimderdi anyqtaıtyn biregeı jobaǵa aınaldy. Jyl saıyn ózindik qoltańbasy bar talantty tulǵalardy halyqqa tanymal etip keledi.
2017 jyldan bastap búginge deıin «Úrker» ulttyq báıgesine qatysqan 2 833 joba qaralyp, onyń 55-i úzdik jáne júldeger atandy. Bıylǵy baıqaýǵa respýblıkalyq jáne óńirlik aqparat quraldarynan 340 ótinish tústi. Árıne, onyń qaı-qaısysy da bıik marapatqa, júldege laıyq.
Degenmen báıge bolǵan soń, onyń jeńimpazyn anyqtaý zańdylyq. Árbir eńbektiń óteýi bolýy tıis. Búgingi shara da osy nıetpen uıymdastyrylyp otyr.
Sondyqtan aýqymdy jumysty baıypty baǵalap, laıyqty saralaǵan joǵary bilikti qazylar alqasyna zor alǵysymdy aıtamyn jáne kil júırikten kim júırikti anyqtaýda ádil sheshim shyǵardy dep senim bildiremin», dedi Aıda Balaeva.
Sonymen, «Táýelsizdiktiń 30 jyldyǵyna arnalǵan úzdik materıal» atalymy «Semeı tańy» gazetiniń tilshisi Rıza Moldashevaǵa buıyrdy. Marapatty táýelsiz Qazaqstannyń alǵashqy Aqparat mınıstri, memleket jáne qoǵam qaıratkeri Qýanysh Sultanov tapsyrdy.
«Jyldyń úzdik reportajy» atalymynda BaigeNews.kz portalynyń jýrnalısi Ánýar Ábdirahmanov jeńimpaz atandy. «Jyldyń úzdik analıtıkalyq materıaly» atalymy «Aqıqat» jýrnalynyń qyzmetkeri Dına Imambaevaǵa buıyrdy.
«Jyldyń úzdik tanymdyq materıaly» atalymynda Massaget.kz portalynan О́mirbek Sansyzbaev jeńiske jetti. Aıta keterligi, júldeni Qyrǵyz Respýblıkasy Mádenıet, aqparat, sport jáne jastar saıasaty mınıstriniń orynbasary Saltanat Amanova tabys etti.
«Jyldyń úzdik jýrnalıstik zertteýi» júldesin Aiqyn gazetinen Rysbek Qydyrbek ıelendi. Al «Jyldyń úzdik suhbaty» atalymynda Vlast.kz portalynyń jýrnalısi Tamara Vaal úzdik shyqty.
«Jyldyń úzdik jańalyqtar portaly» atalymynda «QazAqparat» halyqaralyq aqparat agenttigi jeńiske jetti. «Jyldyń úzdik gazeti» marapaty TÚRKISTAN halyqaralyq saıası aptalyǵyna buıyrdy. «Jyldyń úzdik fotosýreti» júldesi newsroom.kz portalynyń fotosýretshisi Maqsat Shaǵyrbaevtyń qanjyǵasyna baılandy.
«Radıostansııadaǵy úzdik joba» atalymynda NS radıosy «Novoe ýtro» baǵdarlamasy úzdik dep tanyldy. Forbes Kazakhstan ujymy «Jyldyń úzdik jýrnaly» atandy. URKER-2021 ulttyq báıgesi arnaıy júldesi «Qazaq radıosy» ujymyna berildi.
Aıta keteıik, URKER-2021 Ulttyq báıgesi bıyl 11 atalym boıynsha ótkizildi. Sondaı-aq «Táýelsizdiktiń 30 jyldyǵyna arnalǵan úzdik materıal» atalymy qosyldy. Úzdik jumystardy bedeldi jýrnalıster, elimizdiń shyǵarmashylyq zııaly qaýym ókilderi men halyqaralyq medıasarapshylardan quralǵan qazylar alqasy anyqtady.
Baspasóz, radıo, ınternet-jýrnalıstıka salasyndaǵy jetistikteri úshin beriletin qazaqstandyq Ulttyq URKER syılyǵy talantty jýrnalıster men shyǵarmashylyq ujymdardy anyqtaý, olardyń kásibı jýrnalıstıkany damytýǵa qosqan úlesin baǵalaý jáne olardyń shyǵarmashylyǵyna qoǵamnyń nazaryn aýdarý maqsatynda 2017 jyly taǵaıyndalǵan.
Baıqaýdy uıymdastyrýshylar – Aqparat jáne qoǵamdyq damý mınıstrligi, «Medıa damytý qory» korporatıvtik qory jáne «Qazmedıa ortalyǵy» BK. Is-shara demeýshileri – «Qazaqstan» RTRK» jáne «Habar» agenttigi» aksıonerlik qoǵamdary.