Shyǵys Qazaqstan oblysy Zaısan aýdanyna qarasty birneshe eldi mekende ornalasqan sharýa qojalyq ıeleri iri qaranyń qyrylýyna alańdaýly, dep habarlaıdy Egemen.kz.
Jergilikti fermerlerdiń sózinshe, bul jaǵdaı sáýir aıynyń sońyna qaraı bastalǵan. Shilikti, Jalshı, Qarasaı aýyldarynda mal shyǵyny edáýir.
«Mende 150 bastan astam qozy qyryldy. Aýylda iri qara da ólip jatyr. Aýrý belgileri: usaq mal aldyńǵy eki tizesinen kibirtiktep aqsaıdy. Aýyz jáne muryn qýystarynyń shyryshty qabattary jaralanyp, tynysy tarylady. Keıin ystyǵy kóterilip óledi», deıdi «Nurdáýlet» sharýa qojalyǵynyń ıesi Aıbolat Lekerov.
Oblystaǵy veterınarlar alǵashynda qozy men buzaý qystan kóterem shyqqandyqtan ashtan ólip jatqanyn aıtqan edi.
«Eshqandaı juqpaly aýrý joq. Aýyldyq okrýgtegi barlyq mal qystan kóterem shyqqan. 25-28 sáýir aralyǵynda kún sýytyp, jaýyn jaýdy. Osyǵan baılanysty ımmýnıtetteri álsiregen mal qolaısyz aýa raıy saldarynan ólip jatyr», degen bolatyn sol kezde ShQO Veterınarııa basqarmasy basshysynyń orynbasary Ertaı Batholdın.
Qazirgi ýaqytta saraptama nátıjesi de shyǵyp qoıǵan. Qorytyndysyna súıensek, maldyń «anaerobty ınter taksın» degen ınfeksııadan ólgeni anyqtalyp otyr. Alaıda mal ıeleri áli kúnge deıin ne sebepti karantın jarııalanbaǵanyn túsinbeıtindikterin aıtýda. Aıbolat Lekerovtiń sózinshe, jergilikti bılik mal shyǵynyn azaıtyp kórsetkisi keledi.
«О́tken aptadan bastap iri qaranyń da aýrý juqtyrý faktileri tirkelgen. Qazirgi ýaqytta veterınarlar osyǵan baılanysty tıisti sharalardy qabyldaýda. Alaıda bizdiń mamandar iri qaranyń qyrylý faktisin kórgen joq», deıdi QR AShM Veterınarııalyq baqylaý jáne qadaǵalaý komıtetiniń Shyǵys Qazaqstan oblystyq aýmaqtyq ınspeksııasy basshysynyń mindetin atqarýshy Kades Shelekenov.