AQSh-tyń Las-Vegas qalasynda aralas jekpe-jekten ótken UFC týrnırinde Shavqat Rahmonov óziniń óreli ónerimen barsha qazaqstandyq jankúıerlerdi qýantty, dep habarlaıdy Egemen.kz.
Álemdegi eń beldi promoýshende kúsh synasyp júrgen jartylaı orta salmaqtaǵy (77.1 kılo) qandasymyz ekinshi kezdesýin brazılııalyq Mıshel Prazerıske qarsy ótkizdi. Ońtústik Amerıka qurlyǵynyń oǵlany osy sport túrin serik etken 20 jyl ýaqyt aralyǵynda 29 kezdesý ótkizip, 26 ret jeńiske jetti. 13 qarsylasyn esinen tandyrdy. Prazerıs tek Paýlý Tıagý, Kevın Lı jáne Ismaıl Naýrdıev syndy sańlaqtardan utyldy. Sonyń ózinde aıanbaı aıqasyp, olarǵa tek upaı sanymen ese jiberdi.
Desek te Shavqat Rahmonovqa qarsy aıqasta brazılııalyq sportshy esh qaırat kórsete alǵan joq. Báseke bastalǵan betten tizgindi myqtap qolyna alǵan qazaqtyń uly soqqylaryn dál darytyp qana qoımaı, tórttaǵanda da basymdyǵyn baıqatty.
Ekinshi raýndta Rahmonovtyń aýyr soqqysynan keıin Prazerıs biraz eseńgirep qaldy. Shavqat ony jyǵyp aldy da, shabýylyn údete tústi. Arqa tustan jasalǵan soqqylardyń barlyǵy da ońbaı tıdi. Bir mezette ol taktıkasyn dereý ózgertip, «qylqyndyrý» tásilin qoldandy. «Temir qursaýdan» Mıshel qutyla almady.
Osylaısha, 26 jastaǵy Shavqat Rahmonov óziniń 14-shi kezdesýinde jeńis toıyn toılady. Bir keremeti, osy básekelerdiń barlyǵynda ol aıqyn basymdyqqa ıe boldy.