Balyq sharýashylyǵyn damytýdyń 2030 jylǵa deıingi baǵdarlamasy bekitildi, dep habarlaıdy Egemen.kz.
Baǵdarlamada qolda bar áleýetti eskere otyryp, ósirilgen balyq kólemin 30 esege, 2030 jylǵa qaraı jylyna 270 myń tonnaǵa deıin ulǵaıtý kózdelgen. Bul balyq ósirýge jaramdy sý aıdyndaryn paıdalaný, sondaı-aq jańa ınvestısııalyq ındýstrııalyq balyq ósirý jobalaryn iske asyrý jáne jumys istep turǵan sharýashylyqtardy jobalyq qýatyna deıin jetkizý esebinen júzege asyrylmaq. Bul týraly Ortalyq kommýnıkasııalar qyzmeti alańynda ótken brıfıngte Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń tóraǵasy Narıman Júnisov málimdedi.
«2030 jylǵa deıin 1283 jańa balyq ósirý sharýashylyǵy qurylady jáne jumys istep turǵan 288 sharýashylyqty ósirý kólemi ulǵaıtylady. Jobalar ár óńirdiń erekshelikterine qaraı bólindi jáne jergilikti atqarýshy organdar bekitken balyq sharýashylyǵyn damytýdyń óńirlik baǵdarlamalarynda kórsetildi. Qoıylǵan maqsattarǵa qol jetkizý úshin 10 jyl ishinde 340 mlrd teńge jeke ınvestısııalar tartý jáne memlekettik bıýdjetten shamamen 200 mlrd teńge bólý josparlanyp otyr», dedi spıker.
Onyń aıýynsha, 2021 jyly jumys istep turǵan balyq ósirý sharýashylyqtary esebinen 12,8 myń tonna balyq ósirý kútilýde. Jyl basynan beri 7,6 myń tonna taýarly balyq ósirildi.