Qorǵanys mınıstriliginiń apparat keńesinde Qarýly Kúshterge jańa áýe shabýylyna qarsy qorǵanys keshenin jetkizý josparlanǵany jóninde aıtyldy, dep habarlaıdy Egemen.kz.
Bas qolbasshylar men qolbasshylar barynsha jeke quram jumyldyrylǵan mamandyq boıynsha daıarlyq barysyn baıandady. Jaýyngerlik oqýdyń bul kezeńiniń qorytyndysy aldaǵy aptadaǵy baqylaý sabaqtarynyń nátıjelerine qaraı shyǵarylatyn bolady.
Áskerı oqý oryndaryn bitirý rásimderine baılanysty, shildede jas ofıserler men serjanttar áskerlerde qyzmet atqarýǵa barady. Qolbasshylarǵa olardyń qyzmettik mindetterge beıimdelýin, laýazymdy qabyldaýyn, sondaı-aq áleýmettik máselelerdi sheshýdi qarastyrýyn qamtamasyz etýge nusqaý berildi.
Qarýly Kúshterdegi COVID-19-ǵa ujymdyq ımmýnıtet qalyptasqanyn eskere otyryp, jaýyngerilik daıarlyq sharalary tolyq deńgeıde ótkizilýi tıis. Bas áskerı-medısınalyq basqarmasynyń bastyǵy jeke quramnyń 82 paıyzy ekpeniń eki komponentin alǵanyn baıandady. Sonymen qatar, áleýmettik qashyqtyq pen betperde rejımin saqtaý ózekti kúıinde qalyp otyr.
Budan ózge de, qorǵanys mınıstri eldegi sanıtarlyq-epıdemıologııalyq sharalardy kúsheıtýge baılanysty óńirlerdegi ákimshiliktermen aldyn alý sharalaryna Qarýly Kúshterdi qatystyrý máselesin qaraýdy tapsyrdy. Atap ótsek, obektilerdi dezınfeksııalaý, áskerı-dalalyq gospıtalderdi ashý, azamattarǵa kómek kórsetý úshin medısına toptaryn qurý.
«Armııa memleket atqaryp jatqan sharalardan tys qalmaýy kerek», dep atap ótti general-leıtenant Nurlan Ermekbaev.
Mınıstr qatysqan Máskeýdegi IX halyqaralyq qaýipsizdik jónindegi konferensııanyń qorytyndysyn eskerip, Ulttyq qorǵanys ýnıversıteti men Bas áskerı-medısınalyq basqarmasymen birigip áskerı medısınany tájirıbede qoldaný sheńberinde ǵylymı zertteýler júrgizýdi tapsyrdy. Olar otandyq jáne sheteldik tájirıbege júgine otyryp, emdeý baǵytyn ǵana emes, sondaı-aq medısınalyq qyzmettiń kúshteri men quraldaryn eshelondap ornalastyrý, logıstıka, jaýyngerlik ázirlikke keltirýge qajetti merzimder, medısınalyq personalmen jasaqtaý jáne erekshe jaǵdaıda qosymsha medısınalyq mekemelerdi jabdyqtaý sııaqty áskerı qyrlaryn da negizge alyp, eskerýleri qajet.
Qorǵanys vedomstvosynda qarjy tártibiniń máseleleri de qaraldy. О́tken 5 aıǵa júrgizilgen monıtorıng pen qyzmettik taldaýdyń nátıjesine kelsek, obektıvti jáne sýbektıvti sebepterge oraı bıýdjet qarajatyn ýaqytyly ıgermeý jaǵdaıy oryn alǵan. Mınıstr memlekettik satyp alýdy zańǵa sáıkes únemi baqylaýda ustaýdy, áskerge bólingen qarajatty maqsatqa saı ýaqytyly ıgerýdi, al buzýshylyqtar oryn alǵan jaǵdaıda – kináli tulǵalardy jaýapkershilikke tartýdy tapsyrdy.
Qorǵanys vedomstvosynyń basshysy Qarýly Kúshter ardagerleriniń júıeli jumysyna nazar aýdardy. Áskerdiń múddesi úshin osy qyzmette mol tájirıbesi bar burynǵy áskerı qyzmetshilerdi kóptegen salalarǵa tartý qajet. Bul áskerı-patrıottyq tárbıe, qoldanystaǵy zańdy jetildirý, sondaı-aq Qarýly Kúshterdiń keıbir baǵyttaryn damytý bolyp tabylady. Tárbıe jáne ıdeologııalyq jumystar departamentine «Qarýly Kúshterdiń ardagerleri» respýblıkalyq qoǵamdyq birlestiginiń jumysyn jandandyrý tapsyryldy.
Áskerı qyzmetshiler áskerı kıim kıip, memleketti kópshilik aldynda synǵa alyp júrgen, jaýyngerlik mýndırdiń abyroıyna nuqsan keltiretin burynǵy áriptesterin talqylady. Áskerı iske úıretken, bir kezderi elge adal bolýǵa ant bergen memleketti synǵa alýda.
Atalmysh otyrysta áskerdi qaıta jaraqtandyrý is-qımyly baıandaldy. Búginde áýe shabýylyna qarsy qorǵanys quraldary basty nazarda. 2019-2020 jyldary Qazaqstan áskeriniń qarýlanýyna Reseıdiń «Býk» zenıttik-zymyran keshenderi, Belorýssııanyń «Rosa» radıolokasııalyq stansııalary, sondaı-aq elimizdiń áýe shepterin qorǵaýynda turǵan otandyq «Nur» RLS jetkizildi.
Jýyrda zamanaýı «Tor-M2K» zenıttik-zymyran keshenderin jetkizý josparlanýda. «Tor-M2K» kez-kelgen úlgidegi ushaqtar men tikushaqtardy, sonyń ishinde «kórinbeıtin» tehnologııamen jasalǵan tikushaqtardy ǵana emes, sonymen qatar ushqyshsyz ushý apparattaryn, joǵary dáldiktegi qarýdy, sonyń ishinde radıolokasııaǵa qarsy jáne qanatty zymyrandardy, basqarylatyn avıasııalyq bombalardy anyqtap, joıýǵa qabiletti.
Qazirgi ýaqytta ýákiletti organ (Indýstrııa jáne ınfraqurylymdyq damý mınıstrligi) jetkizýshimen sharttar jasasýda. Qorǵanys mınıstrligi atalǵan keshendi ázirlegen zaýytta otandyq ÁShQQ áskerleriniń mamandaryn oqytýdy josparlap otyr.