Aqtaý qalasynda sheteldik ınvestorlar «jasyl» sýtegi óndiretin zaýyt salýdy josparlap otyr. Aımaqtyń ınvestısııalyq áleýetin jáne jobany iske asyrý múmkindikterin zertteý úshin nemis-shved Svevind Energý GmbH kompanııasynyń basshylyǵy men tehnıkalyq komandasy Mańǵystaý oblysyna keldi, dep habarlaıdy Egemen.kz.
Investormen iskerlik kezdesýge onlaın beıne konferensııaǵa QR Premer-Mınıstriniń orynbasary Roman Sklıar qatysty. Kelissózderge sondaı-aq QR Syrtqy ister mınıstriniń orynbasary Almas Aıdarov jáne «KAZAKH INVEST» UK» AQ Basqarma tóraǵasy Meıirjan Iýsýpov qatysty.
Joba sýdy elektrolızdeý jáne tushylandyrý jolymen 30 GVt elektr energııasynan «jasyl» sýtegin óndirýdi kózdeıdi. Jyl saıyn jobada 2 mln tonnaǵa deıin ónim óndirilmek. Investorlardyń aıtýynsha, zaýytta óndiriletin sýtektiń bir bóligin Eýropa elderine men QHR-ǵa eksporttaý josparlanýda. Qalǵan bóligin ınvestorlar Qazaqstanda túrli salalarda shıkizat retinde paıdalaný úshin «jasyl» ammıakqa óńdeýge nıetti. Sheteldik bıznesmender jobany shamamen 6-10 jyldyń ishinde júzege asyrmaq.