Qazaqstanda úsh ýnıversıtettiń bilim berý qyzmetine akkredıtasııasy qaıtaryp alyndy, dep habarlaıdy Egemen.kz Bilim jáne ǵylym mınıstrligine silteme jasap.
«Ortalyq Azııa ýnıversıteti, «Astana» ýnıversıteti jáne Aqtaý gýmanıtarlyq-tehnıkalyq ýnıversıtetiniń akkredıtasııalary keri qaıtaryldy. Sebebi, bul joǵary oqý oryndary bilim berý sapasynyń akkredıtteý standarttaryn saqtamaǵan. Osyǵan baılanysty Táýelsiz qazaqstandyq akkredıtteý ortalyǵy men Akkredıtteý jáne reıtıngtiń táýelsiz agenttigi atalǵan joǵary oqý oryndarynyń akkredıtasııasyn qaıtaryp aldy. Endi bul ýnıversıtetter joǵary bilim týraly qujattardy bere almaıdy, sonymen qatar stýdentterdi de qabyldaýǵa quqyǵy joq», delingen habarlamada.
Vedomstvonyń málimdeýinshe, «Astana» ýnıversıteti men Aqtaý gýmanıtarlyq-tehnıkalyq ýnıversıtetinde budan buryn da akkredıtasııalaý barysynda qıyndyqtar bolǵan.
«Biz osy ýnıversıtettermen sottasyp júrgenimizge bir jyldan asty. Anyqtalǵan zań buzýshylyqtarǵa baılanysty qazir olardy bas lısenzııadan aıyrý sharalary qabyldanyp jatyr. Sońǵy úshinshi tekserý qaldy. Osy joǵary oqý oryndarynyń stýdentteri, ata-analar men oqytýshylarynan shaǵymdar túskenin aıta ketken jón. Olar bilim sapasynyń joqtyǵy, oqytýshylar men ǵylymı jetekshilerdiń jetispeýshiligi, sondaı-aq dıplomnyń ýaqytyly berilmeýine shaǵymdandy. Endi dıplom alý úshin stýdentter basqa joǵary oqý oryndaryna aýysa alady. Ol úshin biz JOO qyzmetiniń úlgilik qaǵıdasyna ózgeris pen tolyqtyrýlar engizdik», delingen habarlamada.
Mınıstrliktiń málimetinshe, talapkerler bul oqý oryndaryna grantqa túse almaıdy, al túlekter dıplom almaıdy. Mundaı jaǵdaıda stýdentter tek basqa ýnıversıtetterge aýysý arqyly ǵana tyǵyryqtan shyǵa alady.
«Atalǵan joǵary oqý oryndaryndaǵy bilim alýshylardyń sany osy ýaqyt ishinde aıtarlyqtaı tómendedi. Ulttyq bilim berý derektor qorynyń aqparatyna sáıkes, Ortalyq Azııa ýnıversıtetindegi bıylǵy oqý jylyndaǵy stýdentterdiń sany 3 070-ten 636-ǵa deıin, «Astana» ýnıversıtetinde – 1 162-den 480-ge deıin, Aqtaý gýmanıtarlyq-tehnıkalyq ýnıversıtetinde – 1 207-den 398-ge deıin azaıǵan», - dedi QR BǴM Bilim jáne ǵylym salasyndaǵy sapany qamtamasyz etý komıtetiniń tóraıymy Gúlzat Kóbenova.
Komıtet túlekter men jumys berýshilerge JOO-nyń ózindik úlgidegi dıplomdardyń serııasy, nómiri jáne QR kody bolatynyn nazar aýdarýyn surady.
«Dıplomdar serııasyn QR BǴM bekitedi. Dıplom nómirlerin generasııalaý arnaıy servıs arqyly júzege asyrylady. Onyń kómegimen joǵary oqý oryndary serııalardy jáne rettik nómirlerdi, sondaı-aq QR kodty alady. Sondaı-aq talapkerler men ata-analardy JOO-nyń oqytý sapasy, oqý ornynyń ınfraqurylymy men oqytý tásilderin zerdeleı otyryp, joǵary oqý oryndaryn tańdaýǵa asqan jaýapkershilikpen qaraýǵa shaqyramyz», delingen habarlamada.
Sonymen birge vedomstvo bastamasymen «Atameken» UKP ótkizetin joǵary oqý oryndarynyń resmı reıtıngine nazar aýdarý qajet. Reıtıng jumys berýshilerdiń bilim berý baǵdarlamalarynyń mazmuny men qazaqstandyq joǵary oqý oryndary túlekteriniń suranysqa ıe bolýyn eskere otyryp jasalǵan. Reıtıngine BǴM jáne «Atameken» UKP saıttarynan qaraýǵa bolady.