Qaraǵandy oblysynda dala órti saldarynan júzdegen mal qyrylyp qaldy. Bul turǵyndardyń jalǵyz tabys kózi, dep habarlaıdy Egemen.kz.
Oqıǵa ornynda túsirilgen vıdeo jáne sýretter áleýmettik jelilerde jarııalanady. Etozhez-pablıginiń aqparaty boıynsha, Ulytaý aýdanynyń Baıqońyr aýylynda ǵana 300 janýar ólgeni anyqtaldy.
«Zardap shekken aýyldar: Keregetas, Oıshybar, Qalybaı, Demeýbaı, Sarysaı, Qyzylsaı, Ermek jáne basqalar. Aýyl turǵyndary bul jaǵdaıǵa nazar aýdarylyp, máseleni sheshý joldary qaralǵanyn qalaıdy», dep jazylǵan pablıktegi jazba sıpattamasynda.
Qaraǵandy oblysynyń TJD-sy jaǵdaıǵa túsinik berdi. Vedomstvo málimeti boıynsha, 4 shildede Qaraǵandy oblysy aýmaǵynda 12 tabıǵı órt oshaǵy baqylaýǵa alynǵan. Onyń ishinde Ulytaý aýdanynyń aýmaǵynda eki órt oshaǵy jáne aldyn ala jalpy aýdany 263 gektar bolatyn 10 órt shyqqan oryn anyqtalǵan.
Jeksenbi kúni keshke Ulytaý aýdanyndaǵy eki aýyldyq okrýgi aýmaǵyn baqylaý aralaý kezinde jergilikti turǵyndar Qoskól aýylynan soltústik-batysqa qaraı 40 shaqyrym jerde órtengen ÝAZ avtokóligin tapty, onyń janynda 1998 jyly týǵan er adamnyń máıiti tabylǵan. Qaza tapqan adam erikti órt quramy qatarynda bolmaǵan jáne órt sóndirýge tartylmaǵan. Er adamnyń qaıtys bolýy sebebin Ulytaý aýdanynyń PB qyzmetkerleri anyqtaıdy.
Jangeldın aýyldyq okrýginiń «Ábdibekov» ShQ aýmaǵynan órtenip ketken 200 bas usaq mal jáne 10 bas iri qara tabyldy.
Tabıǵı órtti joıýǵa barlyǵy 298 adam jáne 77 tehnıka, onyń ishinde órtke qarsy erikti qurama jumylǵan.
Jergilikti atqarýshy organ Jangeldın, Aqtasty jáne Amangeldi aýyldyq okrýgteri aýmaǵynda jergilikti aýqymdaǵy tótenshe jaǵdaı jarııalaý týraly sheshim qabyldady.