Parlament Senatynyń Tóraǵasy Máýlen Áshimbaev feısbýk áleýmettik jelisinde Elorda kúnimen quttyqtady, dep habarlaıdy Egemen.kz.
Qurmetti dostar!
Barshańyzdy Elorda kúnimen shyn júrekten quttyqtaımyn!
Bul – asqaq abyroı men eńseli eldiktiń merekesi. Shyn máninde, Nur-Sultan qalasy – egemen elimizdiń 30 jylda qol jetkizgen eń basty jetistigi men jeńisteriniń biregeıi. Búginde elordamyz – Alashtyń aıbary men aıbyny, qazaqtyń bary men baǵy.
Elbasymyz ásem astanamyzdy salý arqyly ata-babamyzdyń asyl armanyn aqıqatqa aınaldyrdy. Bas qalamyz qysqa merzim ishinde dúnıe júzine táýelsiz Qazaqstannyń iri saıası, ekonomıkalyq, iskerlik, ǵylymı jáne mádenı ortalyǵy retinde tanylyp úlgerdi. Astanamyzdyń álemdik deńgeıdegi máselelerdi talqylaıtyn alań retinde de orny bólek.
Rasymen, elordamyz arqyly elimizdiń abyroı-bedeli artyp, eldigimizdiń irgesi bekı tústi. Táýelsiz Qazaqstannyń aldaǵy maqsat-mindetteri de bas qalamyzben tikeleı baılanysty. Sondyqtan astanamyzdyń ósip-órkendeýi tutas elimizdiń damýyna serpin beretin basymdyq deýge tolyq negiz bar.
Nur-Sultan shahary talaı jannyń armanyna qanat bitirip, ómirden óz ornyn tabýyna da dańǵyl jol ashyp berdi.
Qazirgi tańda Elbasy men Elorda egiz uǵymǵa aınaldy. Sol sebepti, Tuńǵysh Prezıdentimizdiń týǵan kúni men qala kúnin qatar atap ótýdiń sımvolıkalyq máni zor.
Aldaǵy ýaqytta Elbasymyzdyń egemen eldiń negizin qalaý jolyndaǵy eren eńbegin qadirleý jáne memlekettilikti odan ári nyǵaıtýǵa arnalǵan strategııalyq baǵdaryn laıyqty jalǵastyrý – barshamyzdyń abyroıly mindetimiz. Osy jolda barlyq qazaqstandyq judyryqtaı jumylsa, áli talaı belesterdi baǵyndyratynymyz anyq.
Barshańyzdy búgingi merekemen quttyqtaı otyryp, ár shańyraqqa shattyq pen baq-bereke tileımin! Qazaqtyń rýhyn aspandatqan astanamyz jasaı bersin! Elbasymyz aman, elimiz máńgilik bolsyn!