Nur-Sultan qalasyndaǵy Áýezov kóshesi kólik qozǵalysy úshin ishinara jabylatyn bolady, dep jazady Egemen.kz.
Elordalyq Kólik jáne jol-kólik ınfraqurylymyn damytý basqarmasy Nur-Sultan qalasy PD ákimshilik polısııa basqarmasynyń kelisimimen M.Áýezov jáne J.Omarov kósheleriniń qıylysynda bıiktetilgen jaıaý júrginshiler ótkelin ornatý jumystaryn bastady. Osyǵan baılanysty 8-9 shilde kúnderi Abaı dańǵylynan S.Seıfýllın kóshesine deıingi aralyqtaǵy Áýezov kóshesi kólik qozǵalysy úshin ishinara jabylatyn bolady.
Al 9-20 shilde aralyǵynda osy ýchaskede avtokólik quraldary úshin qozǵalys tolyǵymen jabylady.
«Qala joldarynda keptelis týdyrmas úshin elorda turǵyndary men qonaqtary qozǵalys baǵytyn aldyn ala josparlaýy qajet. Keltirilgen qolaısyzdyqtar úshin keshirim suraımyz jáne jóndeý jumystarynyń júrgizilýine túsinistikpen qaraýdy ótinemiz», dep jazylǵan kólik basqarmasynyń habarlamasynda.