Fýtboldan Eýropa chempıonatynyń ekinshi jartylaı fınal oıyny aıaqtalyp, fınalǵa shyqqan eki ujym belgili boldy. «Ýemblıde» ótken ekinshi ½ fınal básekesinde Anglııa men Danııa quramalary ózara kim myqtyny anyqtady. 120 mınýtqa sozylǵan kezdesýde alań ıeleri ústemdik tanytyp, óz tarıhynda alǵash ret Eýropa chempıonatynyń fınalyna joldama aldy. Aǵylshyndardyń buǵan deıin Eýropa birinshilikterindegi eń iri jetistigi jartylaı fınal bolatyn.
Toptyq kezeńdegi alǵashqy eki oıynda Fınlıandııa (1:0) men Belgııadan (2:1) jeńilip, sátsizdikke ushyraǵan Danııa sońǵy týrdaǵy iri jeńisiniń arqasynda (Reseı – 4:1) bıylǵy Eýronyń jartylaı fınalyna deıin jetti. Pleı-off pen shırek fınalda Ýels (4:0) pen Chehııany (2:1) jeńip, ½ fınalda Anglııamen kúsh synasty.
Al aǵylshyndar toptyq kezeńde eki jeńis, bir teń oıynǵa qol jetkizip, 7 upaımen óz kvartetinde birinshi orynmen kelesi kezeńge joldama alǵan-dy. Bir qyzyǵy, Anglııa osy 3 oıynda bar-joǵy eki-aq gol soǵyp, úzdik nátıjege qol jetkizgen Eýropadaǵy sanaýly quramalardyń biri boldy. Al pleı-offta Germanııa qaqpasyna eki gol soqsa, shırek fınalda Ýkraınaǵa jaýapsyz 4 gol saldy. Sóıtip brıtanııalyqtar qarsylas qaqpasyna 8 gol salyp, ózderi birde-bir gol ótkizbeı jartylaı fınalǵa jetti.
Tek jartylaı fınalǵa kelgen kezde ǵana osy týrnırdegi birinshi golyn ótkizip aldy. Londonda ótken kezdesýdiń 30-mınýtynda Danııa fýtbolshysy Mıkkel Damsgor Djordan Pıkford qorǵaǵan Anglııa qaqpasyna sýpergol soǵyp, esepti ashty. Biraq 1992 jylǵy Eýropa chempıondarynyń qýanyshy uzaqqa sozylmady. 39-mınýtta qorǵaýshy Sımon Ker óz qaqpasyna gol soǵyp alyp, tarazy basy qaıta teńesti. Bul – bıylǵy chempıonattaǵy 11-shi avtogol boldy. Buǵan deıin Voıseh Shensny (Polsha), Mats Hýmmels (Germanııa), Merıh Demıral (Túrkııa), Lýkash Gradeskı (Fınlıandııa), Rýben Dıash jáne Rafael Gerreırý (ekeýi de – Portýgalııa), Iýraı Kýska jáne Martın Dýbravka (ekeýi de – Slovakııa), Pedrı (Ispanııa) jáne Denıs Zakarııa (Shveısarııa) óz qaqpalaryna gol soǵyp alǵan bolatyn. Osy jerde eske sala ketetin bir jaıt, buǵan deıingi barlyq chempıonatta bar-joǵy 9 avtogol tirkelgen edi.
Kezdesýdiń ekinshi bóligi Anglııa fýtbolshylarynyń basymdyǵymen ótkenimen, Danııa quramasy qarsylastaryna gol soǵýǵa múmkindik bermedi. Sóıtip ekinshi taım da teń eseppen aıaqtalyp, kezdesý ekstrataımdarǵa ulasty.
Ekstra-taımnyń 104-mınýtynda Danııa fýtbolshylary óz aıyp alańynda Rahım Sterlıngke qarsy oıyn tártibin buzyp, bas tóreshi Dannı Makkelı 11 metrlik aıyp dobyn belgiledi. Penaltıdi Anglııa quramasynyń kapıtany jáne surmergeni Harrı Keın oryndady. Negizi Danııa qaqpashysy Shmeıhel Keınniń soqqysyn alǵashynda qaıtarǵan bolatyn, alaıda qaqpashydan qaıtqan dopqa birinshi jetken Harrı ekinshi múmkindiginde múlt ketpedi.
Makkelıdiń Danııa qaqpasyna belgilegen penaltıi fýtbol sarapshylary men jankúıerleri arasynda daý týǵyzýda. Olardyń aıtýynsha, Nıderland tóreshisi ádiletsiz sheshim qabyldaǵan. Negizi bul jerde basty suraq alańdaǵy tóreshige emes, VAR júıesinde otyrǵan bas tóreshiniń vıdeoassıstenti Polý van Býkelýge qoıylýy kerek. О́ıtkeni beıneqaıtalaýdy jan-jaqty rakýrstan kórgen Býkelý Makkelıge oıyn tártibi buzylǵanyn aıtyp, penaltı belgileýin suraǵan. Eger vıdeoassıstent bul jaǵdaıǵa kúmánmen qaraǵanda, bar sheshimdi bas tóreshige qaldyrý kerek edi.
Qalaı bolǵanda da, Anglııa quramasy Eýropa chempıonatynyń fınalyna joldama aldy. Endi 11 shilde kúni «Ýemblıde» Italııa men Anglııa bıylǵy qurlyq birinshiliginiń bas júldesin sarapqa salady.