«At ústi – áýlıe». Elorda mańyndaǵy Bozoq qalashyǵynda atqa qonǵan jigitter kún júrip, tún júrip Jıdebaıǵa – Abaıdyń týǵan jerine jetti. Myń shaqyrymdyq salt attylar ekspedısııasyn el Táýelsizdiginiń 30 jyldyǵyna oraı Ulttyq At týrızmi federasııasy uıymdastyryp otyr.
Áýeli salt attylar ekspedısııasy qasıetti Shyńǵystaýǵa byltyr jol tartpaqshy bolǵan. Oǵan álemdi jaılaǵan indet kedergi bolyp, at tuıaǵy basyp ótetin Buırataý, Baıanaýyl, Qarqaraly sekildi tabıǵı parkter jabylyp qalǵan. Sóıtip, jospar keıinge qalady. Keıin dep júrip, oraıy el Táýelsizdiginiń 30 jyldyǵyna kelgen eken.
Myń shaqyrymdy júrip ótý týraly oıdy ekspedısııa jetekshisi Berik Aqylbekov tastaǵan. Rýhtandyratyn usynysty taqymdy jigitter qoldaı ketken. Biraq myń shaqyrymdyq jolǵa uzaq daıyndaldy. Nur-Sultan – Baıanaýyl, Nur-Sultan – Qorǵaljyn baǵyttarynda saparlap júrdi.
– At ústinde jıyrma kún júrý ońaı emes. Biraq oı-sanań, deneń at ústine kóndigedi. Alǵashqy kúnderi qınaldyq. Ásirese, Álkeı Marǵulan aýyly men Máshhúr Júsip arasyndaǵy jol aýyr boldy. Kún ystyq. Attardy sýaratyn sý tappadyq. О́zimiz torsyqqa quıǵan sýmen tańdaı jibitip otyrdyq, – deıdi ekspedısııa múshesi Erjan Jaýbaı.
Alaıda at baılaǵan aýyldarynda qonaqjaı qaýym túski, keshki astaryn ázirlep, kútip alyp otyrǵan. Semeıge qarasty Doǵalań aýylyna jetkende jigitterdiń sharshaǵany basylyp, kerisinshe atqa tósele bastaǵan. Tóselmegende deımiz, babalarymyz atpen joryqqa shyǵyp, at ústinde uıyqtap júrdi emes pe?! Attan dese, búgingi urpaq ta osal emes. Asaýdy aýyzdyqtap, abyroıdy asqaqtatyp júrgender jetedi. Sóıtip, salt atty ekspedısııa Shyńǵys taýyn aralap, Abaıǵa jetkende aýdan halqy qushaq jaıa qarsy alǵan.
Ekspedısııa músheleriniń endigi jospary – Altaı men Kaspıı arasyn atpen júrip ótý. Bul úshin at ertteıtin jigitterge úlken ázirlik kerek. Tulparlardyń da tózimdisi tańdalady.
Shyǵys Qazaqstan oblysy,
Abaı aýdany