7-8 shildede «Astana Balet» teatrynyń Kókshetaýdaǵy gastroli tabysty ótti. «Kókshetaý» Mádenıet saraıynda astanalyq ujym «Uly Dala murasy» ulttyq dıvertısmenti men «A Fuego Lento» neoklassıkalyq baletin kórsetti, dep habarlaıdy Egemen.kz teatrdyń baspasóz qyzmetine silteme jasap.
«Teatr – ártister men kórermen qaýym arasyndaǵy qýat almasý úrdisi ǵoı. О́nerdiń basty muraty – túsinikti, uǵynyqty bolý, kórermen iltıpatyna bólený. Gastrol joǵary deńgeıde ótkenin atap ótkim keledi. Kókshetaýlyq kórermen spektaklderdi jyly qabyldap, ártisterge qoshemetin bildirip jatty», - dep atap ótti teatr dırektory Aleksandr Sovostıanov.
Teatrymyzdy áıgilep turǵan «Uly Dala murasy» baǵdarlamasy baletmeısterler Aıgúl Tátı, Mýkaram Avahrı, Anvara Sadyqovalardyń – Qazaqstannyń zamanaýı jáne ulttyq horeografııa óneriniń úzdik úlgilerinen quralǵan avtorlyq ınterpretasııasy. Kókeıge qonar mýzyka men qaıtalanbas kórkem beıneler dúnıejúziniń kórermenin tamsandyryp, júregin áldılegen. Bıdiń ár qımyly – ásemdik, náziktik, san-qyrlylyq, ulylyqtyń úlgisindeı.
«Astana Balet» teatrynyń bas baletmeısteri Mýkaram Avahrıdiń aıtýynsha, «Uly Dala murasy» baǵdarlamasy teatrdyń Qazaqstan men shet elderdegi barlyq gastrolderinde mindetti túrde kórsetiledi. Kórermen qaýym da ony zor yqylaspen qabyldaıdy. Bul – qazaq folklory men zamanaýı jáne neoklassıkalyq balettiń sıntezi ispetti dúnıe.
Ekinshi bólimde brazılııalyq horeograf Rıkardo Amarante qoıǵan «A Fuego Lento» («Baıaý jalyn»)baleti kórsetildi. Kostıýmderinde mınımalızm basym, emosııalary barynsha ashyq, al, eń bastysy – ártisterdiń oryndaýshylyq sheberligi. Sezim men kóńil-kúıdiń san qatparyn jetkize bilgen ártister, kórermen qaýym úshin tyń beıneler men jańa belesterdi ashqan tárizdi.
Teatr buǵan deıin de Kókshetaýda óner kórsetken bolatyn. 2017 jyly «Kókshetaý» Mádenıet saraıynda «Astana Balet GALA» konserttik baǵdarlamasy pash etildi.
«Astana Balet» teatrynyń ujymy daryndy ártister, Qazaqstannyń eńbek sińirgen qaıratkerleri men halyqaralyq baıqaýlardyń júldegerlerinen jasaqtalǵan. Olar elimizdiń mádenı murasyn saqtap, odan ári damytýǵa kúsh salyp keledi. Bıshilerdiń ár qımyly men ısharasy – balettiń ǵajaıyp tili. Sonyń qudiretimen álemniń túkpir-túkpirindegi kórermen kóńiliniń kiltin taýyp, júregin terbetedi.