QR Eńbek jáne halyqty áleýmettik qorǵaý mınıstrligi Áleýmettik kómek saıasatyn damytý departamentiniń dırektory Asqar Nııazov ana kapıtalyn engizý máselesine qatysty túsinikteme berdi, dep habarlaıdy Egemen.kz.
«Halyqaralyq tájirıbege sáıkes, ana kapıtaly ýaqytsha is-shara bolyp sanalady jáne halyqtyń tabıǵı kemý prosesin eńserý úshin týýdy yntalandyrý maqsatynda júzege asyrylady. Ana kapıtaly ómir boıy bir ret nemese eki ret sertıfıkat túrinde belgili bir maqsattarǵa beriledi. Mysaly, buǵan turǵyn úı jaǵdaıyn jaqsartý, balalardy tárbıeleý, múgedektigi bar balany qoǵamǵa beıimdeý jáne biriktirý, ana zeınetaqysynyń jınaqtaýshy bóligi jatady.
Sonymen qatar sertıfıkat ıeleri árqashan ana kapıtalyn paıdalana almaıdy. Mysaly, turǵyn úı satyp alý úshin ıpotekany rásimdeý kezinde somany bastapqy jarna retinde engizý úshin tólem qabilettiligin rastaý kerek, al balalardy oqytý úshin mektepti bitirgenin kútý qajet», dedi ol Ortalyq kommýnıkasııalar qyzmetindegi brıfıng barysynda.
Asqar Nııazovtyń dereginshe, elimizdegi ana men balany qoldaýdyń qoldanystaǵy júıesi óteletin táýekeldiń búkil uzaqtyǵy ishinde járdemaqylardy tóleýdiń ýaqtylyǵy men kezeńdiligine kepildik beredi.
Sonymen qatar, búgingi tańda bala týýdy arttyrý máselesi Qazaqstanda problemalyq aspekt emes. О́ıtkeni 2020 jyly bala týý koeffısıenti 3,13-ke jetti. Al halyqtyń ózin-ózi ósirýi úshin jetkilikti deńgeı 2,1 bolyp sanalady.