Kenshiler astanasynda kórnekti ǵalym, qoǵam jáne memleket qaıratkeri Sultan Dosmaǵambetovtiń músini ornatyldy, dep habarlaıdy Egemen.kz oblys ákiminiń baspasóz qyzmetine silteme jasap.
Abaı kóshesindegi saıabaqta oryn tepken músinniń ashylý saltanatyna qatysqan oblys ákimi Jeńis Qasymbek qaıratker tulǵanyń óńirdiń jáne qazirgi Qazaqstannyń damýyna qosqan úlesin atap ótti.
Atalǵan is-sharada Sultan Dosmaǵambetovtiń zamandastary estelikterimen bólisip, kórnekti ǵalym jáne qoǵam qaıratkeri jaıynda jyly lebizderin bildiristi.
– Ǵalymnyń uly áke aldyndaǵy paryzyn oryndap, ǵıbratty taǵzym kórsetti dep esepteımin. Bul monýmentaldy joba. Qalaǵa tartylǵan keremet syılyq. Sultan Qaparulynyń aramyzdan ketkenine bes jyldan astam ýaqyt ótti, biraq ol sońynan úlken mura qaldyrdy, – dedi otbasynyń dosy Kúlásh Túsipbekova.
Sultan Qaparulynyń uly Erlan Dosmaǵambetov ákesiniń Qaraǵandy qalasynyń ǵana emes, jalpy elimizdiń damýy úshin de kóp kúsh jumsaǵanyn atap ótti.
– Biz ótken ǵasyrda óńirimizdiń áleýmettik-ekonomıkalyq áleýetin qalyptastyrǵandarǵa qurmet kórsettik. Meniń ákeme eskertkish ornatýǵa jáne onyń ashylýyna qatysýshylardyń barlyǵyna alǵys aıtqym keledi. Búgingi alǵan áserimdi sózben jetkizý múmkin emes, – dedi ol tebirenip.
Tuǵyrymen qosa eseptegende bıiktigi tórt metrge jetetin bıýst Reseıdiń jetekshi músinshileriniń biri Aleksandr Tkachýktiń qolynan shyqqan. Qoladan quıylǵan músin Dosmaǵambetovter áýletiniń jeke qarajatyna jasalǵan eken.
Eske salsaq, Sultan Dosmaǵambetov uzaq jyldar boıy partııalyq jáne memlekettik organdarda eńbek etken. Memlekettik basqarýdy qurýǵa jáne damytýǵa eleýli úles qosty.
Sonymen qatar, ol bilim berý júıesinde de jemisti eńbek etti: taý-ken ınstıtýty (qazirgi memlekettik tehnıkalyq ýnıversıtet) kafedrasynyń meńgerýshisi boldy, pedagogıkalyq ınstıtýttyń rektory qyzmetin atqardy.
Sultan Dosmaǵambetovtiń uzaq jylǵy adal eńbegi laıyqty baǵalanyp, ol «Lenın», «Eńbek Qyzyl Tý», «Qurmet belgisi», «Qurmet» ordenderimen, Qazaqstan Respýblıkasy Prezıdentiniń «Alǵys hattarymen» marapattalǵan.