Prezıdent Q.Toqaev qol qoıǵan «Qazaqstan Respýblıkasyndaǵy saılaý týraly» jáne «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zańdaryna sáıkes bolatyn 2021 jylǵy 25 shildede aýyl ákimderin tikeleı saılaýdy ótkizý boıynsha Soltústik Qazaqstan oblysynda bir aýdandyq mańyzy bar qala (Mamlıýt) men oblystyń barlyq 13 aýdanynda 70 aýyldyq okrýg ákimderi saılanatyn boldy, dep habarlaıdy Egemen.kz.
Sonyń ishinde 61 ákimniń ókiletti merzimi aıaqtalǵan, al qalǵan 10 ákimniń ókiletti merzimi toqtatylǵan.
Oblystyq saılaý komıssııasynyń tóraǵasy Tilegen Qaskınniń aıtýyna qaraǵanda oblysta saılaý kezinde 994 adamdy jumyspen qamtyǵan 14 aýmaqtyq, 174 ýchaskelik saılaý komıssııalary jumys isteıtin bolady. Bular oblystyń 218 eldi mekenderinde ornalasqan. Al saılaý ýchaskeleri ashylmaǵan 54 eldi mekenniń saılaýshylary ýchaskelerge arnaıy bólingen kóliktermen jetkiziledi. Saılaýshylardyń jalpy sany 60471 adam. Sonyń ishinde eń kóp daýys beretinder, árıne, aýdandyq mańyzy bar Mamlıýt qalasynyń ákimin saılaıtyndar. Olardyń sany 5366. Al aýyldyq okrýgter arasynda eń kóp saılaýshy Ǵ.Músirepov aýdanyndaǵy Nejın aýyly. Onda 1941 saılaýshy bar. Osy saılaýda 18 jasqa endi tolǵan 280 saılaýshy tuńǵysh ret daýys beredi.
Saılaýǵa túsetin úmitkerlerdi tirkeý 9 shildede aıaqtalǵan. Olardyń sany 237 adam boldy, sonyń ishinde 74-in saıası partııalar usynǵan, qalǵandary ózin-ózi usynýshylar. Bir orynǵa orta eseppen 3,3 úmitkerden keldi. Biraq 9 okrýgte talasqa túsetinder sany 4 adamnan boldy. Bes adamnan turatyn eń kóp úmitker Qyzyljar aýdanyndaǵy Býgrovoı aýyldyq okrýgynde tirkeldi. Barlyq úmitkerlerdiń 30 paıyzǵa jýyǵy áıelder. 110 kandıdat nemese 48,5 paıyzy burynnan memlekettik qyzmet atqaryp kele jatqan adamdar. Sonyń ishinde 43-i osy kezge deıin ákimdik laýazymdy atqaryp júrgender.
Saıası partııalardyń arasynda eń kóp - 58 kandıdat usynǵan Nur Otan partııasy. Qalǵan partııalar 2-3 adamnan ǵana usyna aldy. Tek burynǵy kommýnıstik, qazirgi «Qazaqstannyń Halyq partııasy» ǵana 6 úmitker usynǵan. Aýyl ákimderin saılaýǵa «Aýyl» partııasy nebary 3-aq kandıdat tirketti.
13 shildedegi málimetke sáıkes tekserilgende barlyq 237 kandıdattyń 223-niń qujattarynan eshqandaı shıkilik shyqqan joq. Al 14-niń qujattarynan zańǵa qaıshylyq tabylyp, saılaýǵa túsýge tıym salyndy. Bul jumysqa barlyq tıisti ókiletti organdar tartyldy. Sonyń ishinde Kóshi-qon polısııasy, Prokýratýra, Memlekettik qyzmet departamenti bar.
Saılaýǵa túsetin úmitkerlerdiń arasynda «Bolashaq» baǵdarlamasymen oqyǵan bir azamat bar. Ol Ýálıhanov aýdanyndaǵy «Qaırat» aýyldyq okrýgynyń ákimdiginen úmitker bolyp tirkelgen. Barlyq úmitkerler joǵary bilimdi, mamandyqtary boıynsha 15,2 % – ekonomıst, 16,9 % – zańger, 38,4 % – pedagog jáne 8 % – aýylsharýashylyǵynyń mamany. Úmitkerlerdiń ortasha jasy – 41. Eń jasy 27-de. Al eń tájirıbeli, jasy úlkeni Ǵ.Músirepov aýdanyndaǵy Qyrymbet aýyldyq okrýgyne ákim bolýǵa úmitker bolyp otyr. Onyń jasy 62-de.
Saılaý aldy úgit jumystaryn júrgizýge árbir aýyldyq okrýgke saılanatyn kandıdatqa 220 myń teńgeden, al aýdandyq mańyzy bar qalaǵa ákim bolǵysy keletinderge 230 myń teńgeden bıýdjetten qarajat bólinedi.
Búgingi kúnge oblystaǵy saılaý naýqany qoldanystaǵy zańnama talaptaryna, bekitilgen kúntizbelik josparlarǵa sáıkes júrgizilýde. Saılaý komıssııalaryna ótinishter men shaǵymdar túsken joq.
Saılaý naýqanyn ótkizý barysy týraly barlyq jedel aqparat oblystyq jáne aýdandyq saılaý komıssııalarynyń ınternet-betterinde ornalastyrylǵan.