Isataı aýdanynyń ákimi Polymbet Hasanov «Sý izdegen mal ólip jatyr» degen aqparatty joqqa shyǵardy, dep habarlaıdy Egemen.kz.
Ákimniń aıtýynsha, áleýmettik jelide birneshe aýylda kanal sýy tartylyp, jylqy men iri qara ólip jatqany týraly sýretter jarııalanǵan.
«Biz sol jazba avtorynan áleýmettik jelidegi sýretterdi kim jibergenin, mal ólimi naqty qaı jerde oryn alǵanyn suradyq. Eshqandaı jaýap bolmady. Aýdan ákiminiń orynbasary mamandarmen birge Naryn kanalyn, Manashtaǵy qazandyqty tekserdi. Ras, asyp-tasyp jatqan sý bolmaǵanymen, biraq, mal sýarýǵa jeterlik. Al, jappaı qyrylyp jatqan mal deregi tirkelgen joq. Tek kanaldyń batpaǵyna batyp, ne aýyryp ólgen maldyń óleksesin kezdestirýge bolady. О́ıtkeni, sý qazandyǵynan kóptegen mal sý ishedi», deıdi Polymbet Hasanov.
Onyń málim etýinshe, aýdanda sheshimin kútken máseleler bar.
«Aýdannyń aýmaǵy – shóleıtti, jeri qunarsyz, sortań. Sońǵy jyldary qar men jaýyn-shashyn az mólsherde tústi. Biraq, bıylǵy kóktemde jańbyr mol jaýyp, jaıylymdyq jerge ylǵal tústi. Qum óńirinen basqa eldimekender maly Kaspıı teńiziniń jaǵalaýy men Jaıyqtan bastaý alatyn kanaldardan sý ishedi. Ondaǵy sý deńgeıi birqalypty. Áıtse de, Manash qazandyǵyndaǵy sý deńgeıi tómen. Kanaldarǵa uzaq ýaqyt kúrdeli jóndeý júrgizilmegen. Sonyń biri – «QazSýshar» mekemesiniń teńgerimindegi Naryn kanaly. Atalǵan kanal Mahambet aýdanyndaǵy Sarytoǵaı aýylynan bastalyp, Isataı aýdanyndaǵy tórt aýyldyq okrýg arqyly Naryn aýyldyq okrýgine deıin sozylady. Sondyqtan, «birneshe aýyldyń maly qyrylyp jatyr» degen dáıeksiz áńgime», deıdi ol.