«Gazetpen shybyndy jáne... mınıstrdi «óltirýge» bolady». О́rkenıetti memleketterde erterekte aıtylǵan osy sóz búginde bizdiń elde de ómir shyndyǵyna aınala bastaǵandaı ma, qalaı? Máselen, jýyrda «Egemen Qazaqstan» respýblıkalyq gazeti» aksıonerlik qoǵamynyń menshigine ótip, baǵyt-baǵdaryna qazirgi zaman talabyna saı ózgeris engizilip jatqan «Kazahstanskaıa pravda» respýblıkalyq gazetinde jarııalanǵan, Soltústik Qazaqstan oblysynda «Eńbek» memlekettik baǵdarlamasy boıynsha jumys kúshi artyq ońtústik óńirlerden kóship kelgen qonys aýdarýshylardy qabyldaý isinde óreskel kemshilikterge jol berilgendigi ótkir synalǵan maqalaǵa oraı Memleket basshysy Qasym-Jomart Toqaevtyń tapsyrmasymen keshendi tekseris júrgizilip, nátıjesinde atalǵan óńirdegi Aıyrtaý jáne Esil aýdandarynyń ákimderi qyzmetterinen bosatylyp, oblys pen aýdandyq deńgeıdegi birqatar basshy tártiptik jaýapkershilikke tartyldy.
Al osy qoǵamdy eleń etkizgen eleýli oqıǵaǵa áleýmettik jelide ún qosqandardyń kópshiligi eldiń joǵarǵy bıliginiń gazet synyna der kezinde den qoıyp, jurt kútkendeı, qatań shara qoldanǵanyna quptaý bildirip jatqanda Aıyrtaý aýdandyq gazetiniń bas redaktory ornynan alynǵan ákimdi qımaǵan kóńil-kúıimen qonys aýdarýshy aǵaıyndardyń ar-namysyna tıetin aýyr sóz aıtyp, óziniń ulttyq sana-seziminiń, azamattyq parasatynyń tómendigin ańǵartty. Tek áleýmettik jeli oqyrmandary «ıt terisin basyna qaptaǵandaı» qylyp, óltire synaǵan soń óz jazbasyn óshirip, jurttan keshirim surady.
Teriskeıdegi Qyzyljar óńirine qonys aýdarý taqyryby kesheleri áleýmettik jelide taǵy da kóterildi. Bul joly Soltústik Qazaqstan oblysynyń Mamlıýt aýdanyndaǵy Bostandyq aýylynda jańadan boı kótergen kóz qyzyǵarlyqtaı ádemi turǵyn úıler kópshilik nazaryna usynylǵan eken. Oǵan óz pikirin bildirgen bir soltústikqazaqstandyq sol úılerdi jáne topyraǵy qunarly jerdi óńirge qonys aýdaryp kelip jatqan ózge etnos ókilderinen qyzǵanatyndyǵyn ashyq aıtyp, taǵy da olardyń ar-namysyna tıetin sózge barypty. Qazirgi tańda elimizde qalyptasqan demografııalyq ahýaldan habary shamaly, memlekettiń ishki saıasatynyń ıisi murnyna barmaıtyn, kóz aldyndaǵydan basqany kórmeıtin, oı-túsinigi taıyz, ásire ultshyldyq dertine ushyraǵan pendeniń sózi. «Adamzattyń bárin súı, baýyrym dep!», degen uly Abaı ulaǵatyn da uqpaǵan bir baıǵus-aý ol...
Al áleýmettik jelidegi áńgimege arqaý bolǵan Bostandyq aýylyna «Eńbek» baǵdarlamasy berip otyrǵan múmkindikti múlt jibermeı paıdalanyp, turǵyn úıler salyp, 3 dúngen otbasysyn shaqyryp ákelip qonystandyrǵan osy eldi mekenniń týmasy, kásipker Erlik Muhamedjanov – oı-órisi keń, týǵan aýylynyń da, tutas eliniń de taǵdyryn tereń paıymdap, báz bireýlershe qur aýyzben oraq ormaı, qolynan keletin naqty isti tyndyrymdy atqaryp, jaqsy aty shyǵyp júrgen ultjandy azamat. Ol osylaısha jabylýǵa jaqyn turǵan jergilikti qazaq orta mektebi oqýshylarynyń qataryn tolyqtyrdy. Sebebi árbir dúngen otbasysynda 5-6 baladan bar. Jambyl oblysynyń Qordaı aýdanynda qazaqsha bilmeı ósken dúngender endi ózderin qushaq jaıa qarsy alǵan qazaq aýylynda balalaryn qazaq tilinde oqytyp, ózderi de memlekettik tildi úırenýge tyrysyp jatyr. О́ńirdegi úzdik bilim uıalarynyń biri sanalatyn Bostandyq orta mektebiniń muǵalimderi endi erteńine alańdamaıdy.
О́mir boıy jer tyrmalap, baý-baqsha ósirýmen shuǵyldanyp ósken dúngender jergilikti turǵyndarǵa eńbeksúıgishtiktiń úlgisin kórsetip júr. «Taıaq shanshysań, jetek ósip shyǵady» deıtindeı, asa qunarly qara topyraqty erinbeı kútip-baptap, baǵbanshylyqpen aınalysyp, tabys taýyp júr. Olarǵa jer bolsa, jetedi eken, «aýylda jumys joq», dep eshkimge muń shaqpapty.
Qazirgi almaǵaıyp zamanda elimizdiń soltústik aımaǵyndaǵy ártúrli sebeppen bolashaǵy bulyńǵyrlanǵan Bostandyq sııaqty qazaq aýyldarynan Erlik Muhamedjanov syndy «Elim!» degen erler shyǵyp, ońtústik óńirlerdegi qazaqtarǵa qosa, jermen jumys isteýge sheber dúngen, ózbek, uıǵyr aǵaıyndardyń otbasylaryn kóshirip ákelip jatsa, talaı «altyn besigimizdiń» ajary kirip, tútini túzý ushyp sala bereri anyq.
Uly dala tósinde taǵdyr tabystyrǵan san ult pen ulystyń bir-aq týǵan jeri, bir-aq Otany bar, ol – Qazaqstan. Endeshe el azamattaryn týyp-ósken óńiri men etnosyna qarap bólip-jaryp, alalaýdan aýlaq bolaıyq, aǵaıyn. Qasıetti Táýelsizdigimizdiń tuǵyry – halqymyzdyń birligi ekenin esten shyǵarmaıyq.