Aqtaýdaǵy sottalǵandarǵa arnalǵan jataqhananyń qulaýynan 11 sottalýshy zardap shegip, onyń úsheýi kóz jumdy, dep habarlaıdy Egemen.kz IIM Qylmystyq-atqarý júıesi komıtetiniń baspasóz qyzmetine silteme jasap.
19 shilde kúni saǵat 17.00 shamasynda Mańǵystaý qalasy boıynsha QAJ departamentiniń GM-172/6 mekemesinde sottalǵandarǵa arnalǵan jataqhanalardyń birinde eki qabatty ǵımarattyń birtińdep qulaýy oryn aldy.
«Búginde zardap shekkenderdiń tórteýi medısınalyq tekserýden keıin mekemege qaıtaryldy, olardyń jaǵdaıy jaqsy. Kóz jumǵan sottalǵandardyń jaqyn týystarymen baılanys ornatylyp, qajetti kómek kórsetilip jatyr. Zardap shekkenderdiń bireýi aýyr hálde, úsheýi ortasha deńgeıde túrli jaraqat alǵan», delingen IIM Qylmystyq-atqarý júıesi komıtetiniń baspasóz qyzmeti taratqan habarlamada.
Quramynda mınıstr orynbasary Arystanǵanı Zapparov, QAJ komıtetiniń basshylyǵy, Ulttyq aldyn alý tetiginiń qatysýshylary bar komıssııa jaǵdaıdy anyqtaý úshin oqıǵa ornyna shyqty.
Atalǵan fakti boıynsha Mańǵystaý oblysynyń Polısııa departamenti QR QK 278-babynyń 3 tarmaǵyna sáıkes sotqa deıingi tergeýdi bastady. Arnaıy komıssııa QAJ mekemesiniń aýmaǵyndaǵy barlyq ǵımarattarǵa tehnıkalyq tekserý júrgizýde.