Bıyl Qurban aıt meıramynda onlaın qurbandyqqa tapsyrys berýshilerdiń sany artty. Bul týraly Qazaqstan Musylmandary dinı basqarmasynyń tóraǵasy, elimizdiń Bas múftıi Naýryzbaı Qajy Taǵanuly málim etti, dep habarlaıdy Egemen.kz.
Qazaqstan Musylmandary dinı basqarmasy usynǵan málimetke sáıkes, el boıynsha 2500 adam onlaın qurbandyq shalýǵa tapsyrys bergen. Bul tek túske deıingi ǵana kórsetkish. Saqtyq sharalaryn ustanǵan halyq qurbandyq shalýdyń jańa formatyn tańdaý ústinde. Ár tapsyrysty Qazaqstan Musylmandary dinı basqarmasynyń ókilderi resmı tirkep, onyń oryndalýyn basqarma mamandary jiti qadaǵalaıdy.
Búgin elimizdiń bas múftıi elorda mańyndaǵy qurbandyq shalýǵa arnalǵan oryndardy aralap shyqty.
«Qazaq eli árqashan da qurbandyq shalǵan, bul dástúrimizge saı qalyptasqan dúnıe. Kez kelgen kisi saparda nemese syrtta júrse de bul dástúrdi umytpaǵan. Biraq qazirgi ýaqytta qurban shalý qala turǵyndaryna qıynǵa soǵady, ıaǵnı qala syrtyndaǵy mal bazarǵa baryp, mal tańdaý kerek. Osy oraıda qurbandyq shalyp, qol ushyn sozamyn degen jandar ony onlaın túrde iske asyra alady. Sonymen qatar onlaın qurbandyq shalý dástúrin biz áli de jetildire túsemiz jáne ony aldaǵy ýaqytta tek Qurban aıt meıramynda ǵana emes kez kelgen sátte qoldaný múmkindigi bolady degen úmittemiz. Baıqaǵanymyzdaı onlaın qurbandyqqa tapsyrys berýshilerdiń sany artyp keledi», dedi elimizdiń Bas múftıi Naýryzbaı Qajy Taǵanuly.
Onyń aıtýynsha, onlaın qurbandyq shalýǵa tapsyrys kóbinese Nur-Sultan men Almaty qalalarynan túsip jatyr.
Aıta ketsek, onlaın qurbandyq shalý tájirıbesi Túrkııa, BAÁ jáne Malaızııa elderinde keńinen taralǵan.