Qurban aıt merekesine oraı 20-22 shilde aralyǵynda Qazaqstan halqy Assambleıasy kómekke muqtaj otbasylarǵa qurbandyq etin jetkizetin bolady, dep habarlaıdy Egemen.kz Nur-Sultan qalasy ákimdiginiń resmı saıtyna silteme jasap.
«Búgin Nur-Sultan qalasynyń Qazaqstan halqy Assambleıasy Qurban aıt merekesine oraı Elordanyń 500-ge jýyq áleýmettik osal otbasyna qurbandyq etin jetkizýdi uıymdastyrdy. Bul sharalar kómekke muqtaj otbasylardy qoldaýǵa baǵyttalǵan. Aksııa úsh kúnge sozylady», dedi Nur-Sultan ákimdigi janyndaǵy «Qoǵamdyq kelisim» KMM basshysynyń orynbasary Nurken Ábdiǵalı.
Eske sala ketsek, bıyl qurbandyq shalý rásimi qurban2021.kz. saıty arqyly onlaın júzege asyrylady. Kómekke muqtaj azamattar joǵaryda kórsetilgen saıt arqyly qurbandyq etin alýǵa ótinish bere alady.