Shymkentte halyqaralyq shahmat kúnine oraı eskertkish ashyldy, dep habarlaıdy Egemen.kz.
Ortalyq saıabaqta ornatylǵan shahmat fıgýrasynyń bıiktigi - 3 m, salmaǵy - 4 tonna. Sáýletti músindi «Shymkent – Qazaqstannyń shahmat astanasy» atanýyna oraı «Black Rock Business» JShS-i ókili Baýyrjan Myrzataev Shymkent qalasyna syı retinde tartý etti.
Sondaı-aq búgin Shymkentte shahmattan jasóspirimder arasynda QR Chempıonaty bastaý aldy.
Saıystyń ashylý saltanatyna Qazaqstan shahmat federasııasynyń vıse-prezıdenti Aleksandr Babenko, «Black Rock Business» JShS-i dırektorynyń orynbasary Baýyrjan Myrzataev, Qazaqstan shahmat federasııasynyń dırektorynyń orynbasary Anýar Ismagambetov jáne «Visit Shymkent» ortalyǵynyń basshysy Aıdaráli Ramanov arnaıy qatysty.
Sporttyq saıystyń basty maqsaty – halyqaralyq shahmat arenasynda Qazaqstannyń oń ımıdjin qalyptasyra otyryp, Shymkentti zııatkerlik shaharǵa aınaldyrý.
«Shymkent – Qazaqstannyń shahmat astanasy» ataný sátinde qalamyzda ony aıǵaqtaıtyn arnaıy eskerkishtiń bolýy mańyzdy. Jergilikti turǵyndar men shahmat jankúıerleri úshin Ortalyq saıabaq negizgi orynǵa aınalyp úlgergen. Sondyqtan shahmat fıgýrasyna osy oryn tańdalyp alynǵan.
Shahmat álemdegi keń taralǵan oıyndardyń biri sanalady. Shahmat adamnyń este saqtaý qabiletin jaqsartyp, qıyn suraqtardy sheship, kúrdeli ıdeıalardy oılap tabýǵa septigi mol. Shahmat oıynynan Shymkent qalasynda da jeńisti dástúr bar. Kóptegen halyqaralyq dodalarda Ánuranymyzdy shyrqata bilgen alǵashqy grossmeısterler Rınat Jumabaev, Gúlishan Nahbaeva jáne Jansaıa Ábdimálik, Gúlmıra Dáýletova Shymkent qalasynyń týmasy. Sondaı-aq Qazaqstanda tuńǵysh ret Shymkent mektepterinde shahmat oıyny engizildi. О́ńirlerde shahmatty kópshilikke aınaldyrý – búkil eldiń shahmatshylarynyń shyǵarmashylyq baılanysyn nyǵaıtýǵa múmkindik beredi.
Shahmattan jasóspirimder arasyndaǵy Qazaqstan chempıonatynyń Shymkentte uıymdastyrylýyna bastamashy bolǵan - «Visit Shymkent» ortalyǵy.
Aıta keteıik, maýsym aıynda «Qazaqstan Shahmat Federasııasy» Qoǵamdyq birlestigi men «Visit Shymkent» ortalyǵy arnaıy yntymaqtastyq memorandýmyna qol qoıǵan bolatyn.