«Qyzyl aımaqqa» engen Semeı qalasynda dert dendep tur. Keshegi táýlikte ǵana koronavırýs indeti 40 adamnan anyqtaldy. Jalpy, Shyǵys Qazaqstan boıynsha 104 jaǵdaı tirkelse, onyń kóbi Semeıden shyǵyp otyr. Búginde óńirdiń ınfeksııalyq stasıonarlarynda 560 adam, reanımasııada 53 adam jatyr.
Osyndaı kórsetkishterge baılanysty 18 shildeden bastap Shyǵys Qazaqstan «sary aımaqqa» ótti. Aımaqtyń medısınalyq mekemeleri epıdemııalyq jaǵdaı ýshyǵyp bara jatsa da saqadaı saı. Ázirlikteri joǵary. Densaýlyq saqtaý basqarmasynyń málimetinshe, oblystyń ınfeksııalyq stasıonarlarynda 4 myńǵa jýyq tósektik oryn bar. Qazir ınfeksııalyq tósek qorynyń 14 paıyzynda ǵana naýqastar jatyr. Tarqatyp aıtar bolsaq, О́skemendegi ınfeksııalyq stasıonarlarda 257 adam, Semeıde 226 adam, oblystyń basqa qalalary men aýdandarynda 78 adam em alýda. Al reanımasııalyq tósektik orynnyń sany – 345. Ázirge onyń 15 paıyzy ǵana qoldanysta. О́skemende – 23 adam, Semeıde – 21 adam, oblystyń basqa qalalary men aýdandarynda 9 adam jansaqtaý bóliminde jatyr. О́rshigen indettiń aldyn alý úshin sanıtarlyq talaptardy oryndaý men ekpe alý qajet desedi dárigerler. Sonymen qatar aq halattylar ımmýndyq plazmanyń tıimdiligin dáleldep otyr. Esterińizge sala ketsek, oblystyq qan ortalyǵy mamandary koronavırýspen aýyratyn naýqastardy emdeý úshin elimizde birinshi bolyp ımmýndyq plazma daıyndaı bastady.
– Plazmany aýyrǵan alǵashqy úsh kúnde paıdalansa, nátıje bar. Alaıda naýqastanǵan adam birden dárigerge júginbeıdi. Alty aı buryn naýqastarǵa ımmýndyq plazma paıdalana bastadyq. Qazir saralap otyrsaq, sol em-sharalardyń paıdasy bar. Qazirgi ýaqytta 2 myń 373 dozamyz bar. Jyl basynan 813 naýqasqa plazma quıyldy, – deıdi oblystyq Qan ortalyǵy dırektorynyń orynbasary Svetlana Shmýrygına.
Shyǵys Qazaqstan oblystyq qan ortalyǵy mamandarynyń habarlaýynsha, plazma tapsyrýǵa 6 myń 882 adam nıet bildirgen. Donorlardy irikteý úshin qatań talaptardy eskere otyryp, túrli sebepter boıynsha 80%, ıaǵnı 5 533 adam shettetildi. Immýndyq plazmany 1 291 adam tapsyrdy. Onyń ishinde 903 adam oblystyq qan ortalyǵynda, 435 adam Semeı qalasynyń qan ortalyǵynda tapsyrdy. Nátıjesinde, óńirde COVID-19 indetine qarsy 4 myń dozanyń ımmýndyq plazmasy daıyndalyp, jospar 100% oryndaldy.
Shyǵys Qazaqstan oblysy