Qazir bankte qaryzy joq adam joq shyǵar, sirá?! Qarjy uıymdarynan nesıe alarda kópshiligimiz tutynýshy men bank arasynda jasalatyn kelisimshartty da oqı bermeımiz. Qaryz bergenine máz bolyp, kózdi jumyp, qoldy qoıa salamyz. Negizi bul durys emes. Siz qol qoıǵanyńyzben, quqyńyz buzylyp jatýy múmkin. О́ıtkeni bankterde de adamı faktordan týyndaıtyn qatelikter kóp. Keıbireýler zańdy da qonyshynan basa salady. Qarjy naryǵyn retteý jáne damytý agenttigi qarjy uıymdary jol bergen biraz zań buzýshylyqty anyqtap otyr.
fingramota.kz resýrsynyń habarlaýynsha, 2021 jyldyń alǵashqy jartyjyldyǵynda ekinshi deńgeıdegi bankterge, bank operasııalarynyń jekelegen túrlerin júzege asyratyn uıymdarǵa, saqtandyrý (qaıta saqtandyrý) uıymdaryna, kollektorlyq agenttikterge, mıkroqarjylyq qyzmetti júzege asyratyn uıymdarǵa jáne kredıttik bıýroǵa júrgizilgen tekserýdiń nátıjesinde jalpy somasy 12 681,6 myń teńgege 67 qadaǵalaý usynym sharasy, 43 jazbasha uıǵarym jáne 48 ákimshilik jaza qoldanylǵan. «Banktik qyzmet kórsetý salasyna júrgizilgen taldaý nátıjeleri tutynýshylardyń quqy mynadaı máselede jıi buzylatyny anyqtaldy: bank qyzmetterin kórsetý qaǵıdalary talaptaryn oryndamaý; qaryz boıynsha bereshekti óteý kezektiligin saqtamaý; kepil berýshige kepilge salynǵan múlikke saýda-sattyq júrgizý týraly ýaqtyly habarlamaý; qaryz alýshyǵa quqyqtyń (talaptyń) úshinshi tulǵaǵa aýysýy týraly habarlamanyń mazmuny talabyn saqtamaý; Bankter týraly zańnyń 50-babyna sáıkes bank qupııasyn quraıtyn málimetterdiń qupııasyna kepildikterdi qamtamasyz etpeý; banktik qyzmet kórsetý týraly jarnamada banktiń lısenzııasynyń nómirin jáne lısenzııa bergen organnyń ataýyn kórsetpeý; salym somasyn ýaqtyly tólemeý; shot ıesiniń nusqaýynsyz jınaq shoty boıynsha birneshe márte shyǵys operasııalaryn júrgizý...», delingen Agenttik habarlamasynda.
Ekinshi deńgeıli bankter, sondaı-aq tólemder týraly zańda belgilengen talaptardy da buzyp-jaryp, tólem jáne aqsha aýdarymy jónindegi nusqaýlardy oryndaý merzimderin jıi buzady eken. Qaryzdar boıynsha syıaqy mólsheri týraly aqparatty jarııalaý, taratý kezinde de shynaıy syıaqy mólsherlemesin kórsetpeı qoıa salýǵa bar. Mine, osy sekildi zań buzýshylyqtarǵa baılanysty Agenttik 2021 jyldyń ekinshi toqsanynda bankterge jalpy somasy 1 235,9 myń teńgeni quraıtyn ákimshilik jaza qarastyrǵan.
Saqtandyrý kompanııalary da ózderine sengen tutynýshylardyń quqyn qorǵaı bermeıtini anyqtalǵan. Keıbir kompanııalar kólik quralyna keltirilgen zııan mólsherin anyqtaý kezinde tıisti talaptardy saqtaı bermeıtin kórinedi. Tipti saqtanýshydan alynǵan ótinishti ýaqtyly ombýdsmanǵa jiberý bylaı tursyn, japa shegýshi adamdy kólikke kelgen shyǵyn týraly eseppen tanystyrýdy da artyq jumys kórgen. Mundaı qyrsyz kompanııalarǵa da arnaıy usynymdar jiberilgen.
Al mıkroqarjy uıymdaryna qatysty Agenttik 13 ákimshilik quqyq buzýshylyq týraly hattama boıynsha 9 ákimshilik jaza qoldansa, kollektorlyq agenttikterge qatysty 4 jazbasha uıǵarym, ákimshilik quqyq buzýshylyq týraly 10 hattama toltyrylǵan. Kollektorlar kóp jaǵdaıda boryshkerge jáne úshinshi tulǵaǵa qaǵıdalarda reglamenttelgen aqparatty tolyqqandy habarlaı bermeıdi eken. Sondaı-aq qaryz alýshyny belgilenbegen ýaqytta mazalaý da ózekti máselege aınalǵan. Bul da Agenttiktiń nazarynan tys qalmapty.
Vedomstvo ókilderi qarjy máselesinde azamattardyń quqy buzylsa, Qarjy naryǵyn retteý jáne damytý agenttigine nemese onyń aýmaqtyq bólimshelerine habarlasýǵa bolatynyn eskertedi. Mamandarmen Call-ortalyq (tel.: +7 (727) 237 1000) arqyly baılanysqa shyǵyp, aqyl-keńes alýǵa nemese elektrondy poshta arqyly (info@finreg.kz, TAL@finreg.kz) hat joldaýǵa bolady.