Qazaqstan musylmandary dinı basqarmasy koronavırýsqa qarsy ekpe salýǵa qatysty úndeý jarııalady, dep habarlaıdy Egemen.kz basqarmanyń resmı saıtyna silteme jasap.
«Islam dininde adamnyń ómiri men densaýlyǵynan asqan qundylyq joq. Sondyqtan árbir adam óz densaýlyǵyna asa mán berýi qajet», dep jazady QMBD.
«Alla Taǵala «Baqara» súresiniń 195-aıatynda: «О́zderińdi óz qoldaryńmen qaýip-qaterge salmańdar», – dep buıyrǵan. Alla Elshisi (oǵan Allanyń salaýaty men sálemi bolsyn): «Emdelińder, rasynda Alla árbir dertti shıpasymen qosa jaratty», – degen. Dana halqymyz: «Aýyryp em izdegenshe, aýyrmaıtyn jol izde», – dep shıpa izdeýge úndegen. Sol úshin kez kelgen adam emdelýdiń jáne aýrýdyń aldyn alý joldaryn qarastyrýy tıis. Arnaıy medısına mamandary qazirgi tańda álemge qaýip tóndirgen koronavırýs indetiniń aldyn alý úshin vaksınasııalaýdyń adam densaýlyǵyn saqtap qalýdyń qaýipsiz jáne tıimdi ádis ekenin aıtýda. Al sharıǵat boıynsha zárý jaǵdaıda ekpe salýǵa bolady. Alaıda ekpe saldyrý – ár azamattyń óz erki», - delingen málimdemede.
Sonymen qatar, múftııat eldegi pandemııalyq jaǵdaıdyń kún saıyn kúrdelenip bara jatqanyna alańdaýshylyq bildirdi.
«Juqpaly dertten bir otbasynda birneshe adam jan tapsyrýda. Bul jaǵdaı ekpe saldyrýǵa qatysty oń sheshim qabyldaý qajettigin kórsetip otyr. Osy rette halyqty barynsha saqtanyp, densaýlyǵymyz ben ómirimizdi saqtap qalý úshin ekpe saldyrýǵa úndeımiz. Alla Taǵala halqymyzdy juqpaly indetten saqtap, naýqas jandarǵa shıpa násip etsin! Ámın!», delingen úndeýde.