Búgin Premer-Mınıstrdiń orynbasary Eraly Toǵjanov Ashyq jobasyna belsendi qatysatyn bıznes-qoǵamdastyq ókilderimen onlaın formatta kezdesý ótkizdi, dep habarlaıdy Egemen.kz primeminister.kz-ke silteme jasap.
Keńeske memlekettik organdardyń basshylary, barlyq óńirlerdiń ákimdikteri, «Atameken» ulttyq kásipkerler palatasy jáne Ashyq jobasynyń kóshbasshylary qatysty.
Qazir Ashyq júıesi aıasynda 45 myńnan astam kásipkerlik obekt jumys istep, 4 mıllıonnan astam paıdalanýshy tirkelgen. Ashyq jobasy engizilgen sátten bastap «qyzyl» jáne «sary» mártebesi bar 23 myńnan astam turǵyn anyqtaldy (onyń ishinde oń PTR testi bar 13 516 azamat jáne 9 688 – naýqastarmen qarym-qatynasta bolǵandar).
Vıse-premer elimizdegi epıdemıologııalyq jaǵdaı óte kúrdeli ekenin, 16 óńir «qyzyl» aımaqta turǵanyn nazarǵa aldy. Elimizdiń emdeý stasıonarlaryndaǵy tósek oryndarynyń tolymdylyǵy 54%-ǵa jetti. Densaýlyq saqtaý júıesi ótken jylmen salystyrǵanda eki ese kóp júktememen jumys jasap jatyr.
Bıznes ókilderi óz tarapynan karantın jaǵdaıynda jumys isteýge múmkindik bergeni úshin alǵys bildirip, ózderine alǵan barlyq mindettemeni odan ári saqtaýdy jalǵastyratynyn jáne áriptesterin de osyǵan shaqyratynyn jetkizdi.
«Biz ekonomıkanyń damýyn, sondaı-aq 2 mıllıonnan astam adam jumys jasaıtyn qyzmet kórsetý sektoryndaǵy shaǵyn jáne orta bıznestiń jumysyn toqtatpaý úshin árqashan kásipkerlerdiń adal jumysyn ustanamyz. Memlekettiń senimdi ári jaýapkershilikti bızneske qoldaý bildirgenine rızamyz», dedi «Atameken» UKP basqarma tóraǵasy A. Myrzahmetov.
Sondaı-aq, kásipkerler eki aptanyń monıtorıngi boıynsha 2-9 tamyz aralyǵynda úzdik kórsetkishterge ıe bolǵan júıe kóshbasshylaryna demalys kúnderi jumys isteýge múmkindik berýdi qarastyrý týraly bastama kóterdi. Budan bólek, Ashyq jobasy kóshbasshylarynyń qoǵamdyq qozǵalysyn qurý týraly sheshim qabyldandy. E. Toǵjanov memleket ShOB jaýapty nysandarynyń jumysy úshin barlyq jaǵdaıdy jasaıtynyn aıtty.
Kezdesýdi sońynda, premer-mınıstrdiń orynbasary jaýapty memlekettik organdar men ákimdikterge «Atameken» UKP-men birlesip, barlyq aıtylǵan bastamalardy pysyqtaýdy jáne qajet bolǵan jaǵdaıda koronavırýs ınfeksııasynyń taralýyna jol bermeý jónindegi vedomstvoaralyq komıssııa otyrysynda kelisilgen usynystardy engizýdi tapsyrdy.