Úzdiksiz bilim berý modeli arqyly qazaq tilin ekinshi til jáne shetel tili retinde oqytý ádistemelerin júıeleý, qazaq tili oqý quraldary men qosymshalarynyń mazmunyn til meńgerý talaptaryna sáıkestendirý maqsatynda Ybyraı Altynsarın atyndaǵy Ulttyq bilim akademııasy men Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy yntamaqtastyq memorandýmyna qol qoıdy, dep habarlaıdy Egemen.kz.
Yntymaqtastyqta kelesi sharalar atqarylatyn bolady:
Úzdiksiz bilim berý modeli arqyly qazaq tilin shetel tili jáne ekinshi til retinde oqytý ádistemelerin júıeleý maqsatynda birlesken semınarlar, konferensııalar (betpe-bet, onlaın), basqosýlar, sheberlik sabaqtaryn, dóńgelek ústelder uıymdastyrý; Qazaq tilin oqytýǵa til mamandaryn tarta otyryp ádistemeler qalyptastyrý, dárister oqý, ózara qyzyǵýshylyq týdyratyn salalar boıynsha zertteýler júrgizý; Til meńgerýdiń ozyq ádistemelerin paıdalanyp, ınternet jáne mobıldi baılanys jelileri arqyly qashyqtan oqytýǵa arnalǵan ádistemelik quraldar ázirleý; Qazaq tilin oqytýǵa arnalǵan ádistemelik quraldar mazmunyn júıeleý maqsatynda saraptamalyq qorytyndylar ázirleý; Qazaq tilin shetel tili jáne ekinshi til retinde oqytýǵa arnalǵan leksıkalyq jáne grammatıkalyq mınımýmdardy anyqtaý, naqtylaý, júıeleý; Eresekterge qazaq tilin oqytýǵa arnalǵan oqýlyqtar men oqý quraldarynyń mazmuny men qurylymyna taldaýlar ázirleý; Til mamandarynyń, óńirlik tilderdi oqytý ortalyqtarynyń oqytýshylar men ádiskerleri úshin biliktilikti arttyrýdyń onlaın kýrstaryn jáne tájirıbe almasýdy uıymdastyrý.Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń Bas dırektory mindetin atqarýshy Erbol Tileshov qazaq tilin ekinshi til retinde oqytý barysyndaǵy qordalanǵan mazmundyq jáne uıymdastyrýshylyq máselelerdi jáne olardy birlesip sheshý joldaryna usynystardy baıandady.
Y.Altynsarın atyndaǵy Ulttyq bilim akademııasy Prezıdenti Ǵanı Bektaev bilim sapasynyń mazmundyq negizdemelerin qalyptastyrýshy mekeme retinde jahandyq kezeńdegi qazaq tiliniń damýyna akademııanyń ǵylymı jáne ádistemelik áleýetin paıdalana otyryp, áripestikte birlesip jumystar atqarýǵa daıyn ekendigin jetkizdi.
Ekijaqty kezdesý yntymaqtastyq memorandýmyna qol qoıý rásimimen aıaqtaldy.