Senator Erik Sultanov Soltústik Qazaqstan oblysyna sapary barysynda birqatar aýdandy aralap, turǵyndarmen kezdesti, dep habarlady Senattyń baspasóz qyzmeti.
Depýtat ınfraqurylym jobalarynyń júzege asýy, atap aıtqanda, káriz jelileri men tazartý qurylǵylarynyń, sondaı-aq 50 páterli turǵyn úı qurylysynyń barysymen tanysty.
Erik Sultanov «Eńbek» memlekettik baǵdarlamasy aıasynda elimizdiń ońtústik óńirlerinen kóship kelgen qonys aýdarýshylarmen de kezdesti. Senator birneshe mańyzdy mindetti, onyń ishinde eldiń soltústik oblystaryndaǵy eńbek resýrstarynyń tapshylyǵy problemasyn sheshýge múmkindik beretin osy memlekettik baǵdarlamany iske asyrýdyń mańyzyn atap ótti. Sonymen qatar elimizdiń basshylyǵy qazir qonys aýdarýshylarǵa laıyqty jaǵdaı jasaýǵa basa nazar aýdaryp otyrǵanyn jáne senatorlar bul máseleni baqylaýda ustaıtynyn jetkizdi.
Erik Sultanov aýyl eńbekkerlerimen aýyl sharýashylyǵy ónimderine baǵa belgileý máselelerin de talqylady. Aıyrtaý aýdanyndaǵy jergilikti sút óńdeý kásipornynda ótken fermerlermen kezdesý barysynda senator barlyq óńirde jergilikti ónimdi ótkizý naryǵyn keńeıtýdiń mańyzdy ekenine toqtaldy.
«Aýdan turǵyndarynan qabyldanatyn sút laıyqty baǵamen satyp alynýǵa tıis. Aýdannyń barlyq saýda ornyn jergilikti sút ónimderimen qamtý qajet», dedi senator.
Depýtat sondaı-aq aýa tiregi tehnologııasy boıynsha salynyp jatqan oblystaǵy jalǵyz kópfýnksııaly sport kesheni qurylysynyń barysymen de tanysty. Senat depýtaty qurylys alańyn qarap shyǵyp, qarajattyń jumsalýyn qatań baqylaý qajettigine, sondaı-aq sport nysanynyń ýaqtyly iske qosylýyn qamtamasyz etýge nazar aýdardy.