Ekinshi orta salmaqtaǵy qazaqstandyq boksshy Álı Ahmedov (16-1, 12KO) kelesi jekpe-jegin jazdyń sońynda ótkizedi, dep habarlaıdy Egemen.kz.
VKontakte áleýmettik jelisindegi «Qazaqstannyń kásipqoı boksy» paraqshasy BoxRec.com saıtyna silteme jasap habarlaýynsha, GGG Promotions promoýterlik kompanııasyndaǵy qazaqstandyq boksshynyń aıqasy Kosta-Mesede (Kalıfornııa shtaty, AQSh) 26 tamyzda ótedi.
Onyń qarsylasy ázirge belgisiz. 1 tamyz kúni Álı Albýkerkede (Nıý-Meksıko shtaty) perýandyq «Pantera» laqap atymen belgili Davıd Segarromen (34-5, 21KO) judyryqtasýy tıis edi. Alaıda jekpe-jekke birneshe saǵat qalǵanda latynamerıkalyq boksshydan koronavırýs anyqtalýy sebebimen kezdesý ótkizilmedi.