Qostanaı oblysynyń turǵyndaryn koronavırýsqa qarsy ekpemen qamtý maqsatynda mektepterde vaksına pýnktteri ashyldy, dep habarlaıdy Egemen.kz QazAqparat saıtyna silteme jasap.
«Halyqtyń basym bóligin vaksınamen qamtý úshin barlyq is-sharalardy qabyldap jatyrmyz. Sol sebepti mektepterdegi medısına pýnktterin jumyldyrýdamyz. Qostanaı ákiminiń bastamasymen qaladaǵy birqatar mektepte ekpe pýnktteri ashyldy. Bul pýnktter qandaı da bir sebeptermen emhanaǵa kele almaıtyn nemese emhanadan shalǵaıda turatyn halyqty qamtý úshin ashylyp otyr. Kún saıyn tańerteń vaksına ákelinedi, al keshkisin emhanaǵa jetkiziledi. Barlyq sharttar qatań saqtalady», dedi qalalyq №4 emhananyń bas dárigeri Margarıta Bısenova.
Mektepterdiń janyna ekpe pýnktterin ashý týraly sheshim koronavırýsqa qarsy is-qımyl jónindegi qalalyq shtab otyrystarynyń birinde qabyldanǵan bolatyn.
Qostanaı qalasy ákiminiń orynbasary Saıat Shaımurynovtyń atap ótýinshe, qalanyń shaǵyn aýdandaryndaǵy pýnktter turǵyndarǵa qolaıly bolýy úshin ashylǵan. Olar tańerteńnen keshke deıin demalyssyz jumys isteıdi.
«Qostanaıda qosymsha pýnktterden bólek saýda oıyn-saýyq ortalyqtarynda jyljymaly pýnktter de jumys istep tur. Al qosymsha pýnktter emhanalarǵa júktemeni azaıtý jáne shalǵaı shaǵyn aýdandar men qala mańyndaǵy eldi mekenderdiń turǵyndaryna qolaıly bolýy úshin ashyldy. Adamdar jumystan keıin emin-erkin jaqyn mańdaǵy mektepten ekpe alýy úshin jasaldy», dedi Saıat Shaıjúnisov.
Búginge deıin Qostanaıdyń 250 myń turǵynynyń 90 myńy vaksına alyp úlgerdi. Jalpy qalada 164 myń adam vaksına saldyrýy tıis.