Sýdan bıligi burynǵy Prezıdent Omar Ál-Bashırdi Halyqaralyq qylmystyq sotqa berýge kelisti, dep habarlaıdy Egemen.kz Reuters-ke silteme jasap.
Eldiń Syrtqy ister mınıstri Marıam Ál-Mahdı Mınıstrler Kabıneti Gaagaǵa izdeýde júrgen adamdardy ekstradısııalaý týraly sheshim qabyldaǵanyn aıtty. HQS Ál-Bashırdi genosıd, soǵys qylmystary jáne Darfýrdaǵy qarýly qaqtyǵys kezinde adamzatqa qarsy qylmystar jasady dep aıyptaıdy.
BUU-nyń baǵalaýy boıynsha, Darfýrda 2003-2006 jyldar aralyǵynda 300 myńǵa jýyq adam qaıtys boldy, taǵy eki jarym mıllıon adam zorlyq-zombylyqtan qashyp, týǵan jerlerin tastap ketýge májbúr boldy. Tergeý málimetteri boıynsha, ál-Bashır kóterilisti basý úshin arab atqyshtarynyń otrıadtaryn Darfýrǵa jibergen, olar jappaı kisi óltirgen, úılerin órtep, tonaýmen aınalysqan.
BUU Qaýipsizdik Keńesi 2005 jyly Halyqaralyq qylmystyq sotqa Darfýrdaǵy qylmystardy tergeýdi tapsyrdy. 2008 jyly Gaagadaǵy sot ál-Bashırdi áskerı qylmys jasady degen aıyppen qamaýǵa alýǵa sanksııa berdi, biraq áli kúnge deıin ony jaýapqa tarta almady.
Omar ál-Bashır qazirgi ýaqytta Sýdanda qamaýda, onda ol sybaılas jemqorlyq jáne demonstranttardy óltirdi dep aıyptalýda.