«Rýhanı Jańǵyrý» Qazaqstandyq qoǵamdyq damý ınstıtýty (QQDI) alańynda Rapid Foresight ádistemesi negizinde Qazaqstanda 2035 jylǵa deıingi balalyq shaq damýynyń boljamy men ssenarııin qalyptastyrý boıynsha forsaıt-zertteý bastaldy. Sessııaǵa qatysýshylar úshin atalǵan tehnologııamen tanysý maqsatynda semınar-trenıngter serııasy ótkizildi.
«Balalyq shaq» forsaıt-zertteýleri «Kemel bolashaq» ortalyǵynyń qyzmetin qurý jáne qoldaý» jobasy aıasynda júzege asyrylyp jatyr. Bul zertteý qoǵamdyq sanany jańǵyrtý baǵyttaryn eskere otyryp, Qazaqstanda bala damýynyń strategııasyn qurýǵa kómektesedi dep josparlanýda.
Instıtýt alańynda forsaıt-zertteýler quramyna kiretin oqý semınarlary aıaqtaldy. Olardy Rapid Foresight ádistemesi boıynsha moderator, «Jańa kásipter atlasy» jobasy jetekshisiniń orynbasary Evgenıı Vınogradov júrgizdi.
Sharaǵa 40-qa jýyq sarapshy, ÚEU, memlekettik organdardyń ókilderi jáne QQDI qyzmetkerleri qatysty. Qatysýshylar ózderi úshin forsaıt uǵymyn, onyń mańyzy men negizgi kezeńderin anyqtady.
Forsaıt-zertteýleri úshin qoldanylatyn Rapid Foresight tehnologııasy – zertteletin ortada bolyp jatqan ózgeristerdi sıpattaýǵa, bolashaqtyń beınesin jáne oǵan jetý úshin qajetti ózgeristerdiń jobalaryn kelisýge múmkindik beretin toptyq pikirtalastar jıyntyǵy. «Bolashaqtyń beınesin kórý úshin sarapshylar toby qazirgi jaǵdaıdy qarastyrady, onyń damýyn boljaıdy, qaterler men múmkindikterdi talqylaıdy jáne qaterlerdi toqtatý men múmkindikterdi paıdalaný úshin qajet túrli qoldaý sharalaryn usynady. Osydan keıin sarapshylar damý jobalaryn jasaıdy, ıaǵnı yqtımal nusqalardan ońtaıly bolashaqqa jetý úshin búgin ne isteý kerektigin aıtady», deıdi Evgenıı Vınogradov.
Al aldaǵy qyrkúıek aıynda QQDI alańynda birqatar mamannyń qatysýymen balalar bolashaǵy týraly forsaıt-sessııasy josparlanǵan. «Biz úshin balalarmen qarym-qatynastyń ártúrli jaqtaryn, akterlerdi múmkindiginshe qamtý mańyzdy. Qazir biz aldyn ala qaraý sessııasynda talqylaýǵa bolatyn negizgi aspektilerdi anyqtaý boıynsha aldyn ala jumystar júrgizip jatyrmyz», deıdi ol.
Eske salsaq, ótken jyldyń basynda QQDI 2035 jylǵy jas qazaqstandyqtyń beınesi, ınklıýzıvti dúnıetanym men ınklıýzıvti qoǵamdy qalyptastyrý, sondaı-aq «Qazaqstan halyqaralyq arenada» baǵyty boıynsha forsaıt-sessııalaryn ótkizdi. Bul sessııalar Rapid Foresight ádistemesi negizinde júrgizildi.
Daıyndaǵan
Joldybaı BAZAR,
«Egemen Qazaqstan»