Qazaq sportshylary úshin asa sátti bola qoımaǵan Tokıo Olımpıadasynyń qorytyndysy aldaǵy qyrkúıek aıynyń sońyna qaraı shyǵarylyp, ári qaraı Parıj Olımpıadasyna daıyndyq bastalady. Bul týraly Ulttyq Olımpıada komıtetiniń bas hatshysy Andreı Krıýkov Ortalyq kommýnıkasııalar qyzmetinde ótken brıfıng barysynda málimdedi.
Bas hatshy Olımpııa oıyndaryndaǵy nátıjelerge qaramastan, árbir sportshymyzdyń jetistigin maqtan tutatynyn jetkizdi. Sondaı-aq A.Krıýkov Tokıo Olımpıadasyndaǵy Qazaqstan quramasynyń sátsizdigine 10 qyrkúıekke deıin taldaý jasalatynyn aıtty.
– Aldaǵy aptalarda Ulttyq Olımpıada komıteti respýblıkalyq federasııalarmen ári Mádenıet jáne sport mınıstrligimen birlesip Olımpııa oıyndaryndaǵy ulttyq qurama komandalarynyń nátıjesi men daıyndyǵyna qatysty taldaý jumysyn júrgizedi. 10 qyrkúıekke deıin sport federasııalary Olımpıada boıynsha naqty esepti usynady. Onda sportshylardyń sátti nemese nátıjesiz óner kórsetýi máselesine qatysty taldaý bolady. Qyrkúıektiń sońyna qaraı biz sońǵy qorytyndyny shyǵaramyz. Osydan keıin qatelikterdi túzetý men kelesi olımpıadalyq sıklge daıyndyq jumystary bastalady, – dedi Ulttyq Olımpıada komıtetiniń bas hatshysy.
Al jıynǵa qatysqan Mádenıet jáne sport vıse-mınıstri Erlan Qojaǵapanov elimizde sport túrlerin qarjylandyrý tetigine keńinen toqtaldy. Ol sport túrlerinen bıýdjet qarajatynyń ashyqtyǵy men teńgerimdi bólýdi qamtamasyz etý maqsatynda 2017 jyly zańnamaǵa sport túrlerin saralaý túsinigi engizilgenin, sol erejege sáıkes júrgizilgen saralaý rásimderi nátıjesi boıynsha aldaǵy eki jylǵa basymdyq beriletin sport túrleriniń tizbesi bekitiletinin jetkizdi.
– Saralaý kórsetkishterin aıqyndaýdyń negizgi krıterıılerine jarystarda tıisti sport túri boıynsha sportshylardyń jetistikteri, materıaldyq-tehnıkalyq bazanyń bolýy, óńirdiń klımattyq jaǵdaıyna saı sport túrleri erekshelikteri jatady. Osynyń nátıjesinde sport túrleri negizgi úsh topqa bólinedi. Birinshisi – damyǵan sport túrleri, ekinshisi – joǵary áleýetke ıe sport túrleri, úshinshisi – damýdyń tómen áleýetine ıe sport túrleri. Osy arqyly qazirgi kezde sportty qarjylandyrýdyń modeli ázirlendi. Bul óz kezeginde respýblıkalyq deńgeıde qarajatty obektıvti bólýge kepildik beredi, – dedi vıse-mınıstr.
Qazaqstan boks federasııasynyń bapkerlik máseleler jónindegi vıse-prezıdenti Baqtııar Artaev boksshylardyń Tokıo tórinde kórsetken nátıjesin sátsizdikke balap, aldaǵy ýaqytta bokstan ulttyq quramanyń quramy 80 paıyzǵa deıin jańaratynyn aıtty.
– Tokıo Olımpıadasynda biz Rıodaǵy nátıjeni qaıtalaı almadyq. Brazılııada boksshylarymyz bir altyn, eki kúmis, bir qola medal jeńip alǵan bolsa, bıyl buıyrǵany eki qola ǵana boldy. Osyǵan baılanysty aldaǵy ýaqytta saraptama júrgizemiz. Qazannyń sońynda Serbııanyń bas shahary – Belgradta álem chempıonaty ótedi. Sol álem birinshiligine múldem jańarǵan quram barýy múmkin. Sonymen qatar quramaǵa qazirgi tańda kásipqoı boksta táýir óner kórsetip júrgen jigitter de kelýge daıyn ekenin jetkizdi. Endi kimder birinshi oqý-jattyǵý jıynyna kelip daıyndyqqa kirisedi, sol boksshylar álem chempıonatynda judyryqtasýǵa múmkindik alady, – dedi B.Artaev.
Sonymen qatar Qazaqstan grek-rım, erkin jáne áıelder kúresi federasııasynyń vıse-prezıdenti Gıýzel Manıýrova qazaqstandyq sportshylardyń Olımpıadadaǵy ónerine qatysty pikir bildirdi.
G.Manıýrovanyń aıtýynsha, áıelder kúresi nátıjesin boljaý múmkin emes jáne statıstıka shyǵarý ońaı bolmaıdy. «Sondyqtan áıelder kúresine qatysty naqty boljam jasaý qıyn, ıaǵnı júldeli orynnan kórinýi tıis sportshylar senimdi aqtamady. Bul rette sátsizdik, óz kúshin durys baǵalamaý, 5 jyl boıy sportshylarǵa túsken psıhologııalyq qysym bizge teris nátıje berdi», dedi G. Manıýrova.